Një hartë e fotoshopuar që tregonte Listenbourg – një vend imagjinar i futur qëllimisht në gadishullin Iberik – u shfaq në rrjetet sociale dhe shakaja pushtoi botën.

“Jam i sigurt që amerikanët nuk e dinë emrin e këtij vendi,” shkroi @gaspardo, një përdorues i Twitter-it, duke bërë shaka me faktin që thuhet se amerikanët kanë mungesë të theksuar të njohurive në gjeografi.

Në hartë, @gaspardo ka shtuar me fotoshop një copë toke sipër kufirit mes Spanjës dhe Portugalisë, të ngjyrosur me ngjyrë jeshile për të dhënë idenë e një shteti të Bashkimit Europian.

Një përdorues tjetër u përgjigj menjëherë: "Kush nuk e njeh Listenbourg?" — dhe kështu lindi një meme e re.

Disa e çuan lojën në një tjetër nivel: Ja edhe pasaporta.

Njerëzit në Reddit nisën të shpiknin informacione në dukje reale: si për shembull që Listenbourg ka çmimin më të madh të Formula 1 dhe se astronautët e tij ishin pjesë e një misioni në Hënë.

Një tjetër postim në Twitter pohoi se mbreti i Listenbourg, Listen XV, ishte, në fakt, Mbreti Diell i parë, i cili shkoi në luftë kundër Louis XIV për titullin prestigjioz në 1661.

Në YouTube, në një llogari zyrtare të supozuar të qeverisë së Listenbourg, u shfaq himni dhe flamuri kombëtar.