Rupert Grint mund të ketë marrë rolin e jetës në "Harry Potter", por aktori pranon se jo gjithçka ishte ashtu siç dukej.

34-vjeçari, i cili luajti mikun më të mirë të Harry Potter, Ron Weasley nga viti 2001 deri në 2011, tha se përvoja ishte nganjëherë "mbytëse".

“Potter ishte kaq intensive – xhirime gjatë gjithë vitit, ndërsa pjesën tjetër të kohës ne do të promovonim filmin. Ishte mjaft mbytëse”, tha ai për Bustle.

“Doja një pushim, për të reflektuar për gjithçka… Ishte një përvojë e vështirë, por mendoj se e mbyllëm në kohën e duhur. Nëse do të vazhdonim, mund të kishte shkuar keq.”

Diku tjetër në intervistë, aktori tha se në një pikë, u bë e paqartë se kush ishte ai dhe kush ishte personazhi.

"Ndjeja se u lashë në hije. Unë dhe personazhi im u bëmë një. Në një pikë po luaja thjesht veten time."

Grint zbuloi se ai ende i përgjigjet emrit "Ron" nëse dikush i drejtohet në këtë mënyrë, duke shtuar se tani është "emri i tij i dytë".

Aktori sot është babai i një vajze, Wednesday G. Grint, me partneren e tij Georgia Groom. Ata u njohën në vitin 2011 dhe u bënë prindër në maj 2020.