Aktori dhe regjisori italian Francesco Nuti është ndarë nga jeta në moshën 68-vjeçare.

Njoftimin për vdekjen e tij e bëri e bija, Ginevra, e cila së bashku me familjarët falenderuan personelin shëndetësor dhe të gjithë ata që janë kujdesur për aktorin për një periudhë relativisht të gjatë.

I lindur në Prato, Nuti e filloi karrierën e tij profesionale si aktor në fund të viteve 1970, kur formoi grupin “Giancattivi” së bashku me Alessandro Benvenuti dhe Athina Cenci. Një vit më pas, Nuti e braktisi treshen dhe filloi një karrierë solo me tre filma me regji nga Maurizio Ponzi: “Madonna che silenzio c'è stasera” (1982), “Io, Chiara e lo Scuro” (1982) dhe “Son contento” (1983).

Duke filluar nga viti 1985, ai u bë regjisor i filmave të tij dhe shënoi menjëherë sukses me prodhime si “Casablanca, Casablanca”, “Tutta colpa del paradiso”, “Stregati”, “Caruso Pascoski di padre polacco”, “Willy Signori e vengo da lontano”, “Donne con le gonne”.

Në vitin 1988, ai mori pjesë edhe në Festivalin e Sanremos me këngën "Sarà per te", të regjistruar më pas nga Mina.

Vitet ’90 shënuan një periudhë rënieje për aktorin dhe regjisorin, pasi filmat e tij nuk patën fort sukses. Në vitet në vijim, Nuti filloi të vuante edhe nga depresioni dhe varësia nga alkooli.

Më 2 shtator 2006, pak para se të fillonte xhirimet e një filmi të ri, ai u shtrua në spital pasi një rënieje nga shkallët ku pësoi dëmtime të shumta. Aksidenti i shkaktoi Nuti-t një hematomë subdurale që çoi në dëmtime serioze celebrale duke e lënë të paaftë për të folur dhe lëvizur.

Në vitet në vijim, disa paraqitje publike në televizionin italian shfaqën publikisht gjendjen e tij me aftësi të kufizuara, duke nxitur një reagim të fuqishëm emocional nga fansat e Nuti-t dhe zemërim për atë që u perceptua si shfrytëzim i pamëshirshëm i vuajtjeve të ish-regjisorit.

Francesco Nuti iste një aktor i njohur edhe për shqiptarët në vitet 1980 - 1990.