Industria e kinemasë dhe serialeve shqiptare po zhvillohet me hapa të sigurt, duke sjellë projekte të reja që premtojnë të na mbajnë të ngjitur pas ekranit. Me personazhe të spikatura, tema bashkëkohore dhe produksione që synojnë cilësi të lartë, viti 2025 sjell një valë të re krijimesh që përqafon humorin, dramën dhe aksionin. Nga komedi “road trip” deri te serialet frymëzuar nga “Guy Ritchie” dhe filma që trajtojnë çështje shoqërore, ekranet shqiptare premtojnë të jenë plot gjallëri dhe emocion. Ja çfarë duhet të dini për prurjet më të fundit në botën e filmit dhe serialeve shqiptare!

Luli & Goni Lemes

Në vitin 2021, Klaudia Brahimaj nisi të punonte për “Luli & Goni Lemes”, një komedi “road trip” që përfshin dy protagonistë kryesorë, Lulin dhe Gonin. Kjo histori ka pasur disa ndryshime gjatë procesit të krijimit dhe Klaudia tregon për Anabel se skenari ka mbetur i paqartë derisa ka pasur një takim me Aurela Gaçen. Ky takim ka ndihmuar në përfundimin e vizionit të filmit dhe plotësimin e skenarit me personazhin e Lemes. 

Në këtë film, Goni (Dejvis Myslymi), një djalë mami tipik dhe Lemja (Aurela Gaçe), nëna e tij autoritare, po kthehen nga emigrimi për të gjetur një nuse shqiptare tradicionale. Planifikimi i tyre dështon kur Luli (Margent Caushi), një personazh komik dhe naiv, bashkohet me ta në udhëtimin e tyre. Edhe pse Luli ka si qëllim të ndihmojë, ai shpesh e bën situatën më të vështirë. Pjesë e kastit është edhe Fjoralba Ponari. Filmi pritet të dalë në prill 2025 në të gjitha kinematë.

Niçe

Në shkurt të këtij viti, sipas burimeve të Anabel seriali “Niçe” do të shfaqet në Top Channel. Ky serial, i prodhuar nga Xhorxh Baxhaku, është një komedi dhe aksion, i frymëzuar nga stili i regjisorit Guy Ritchie. Ngjarjet do të ndodhin rreth Denisit, një personazh kryesor i quajtur edhe Niçe, që përfaqëson një anti-hero. Ky personazh është një njeri i pamoralshëm që e kompenson mungesën e dijes akademike me mësimet e jetës. Roli kryesor është në duar të Brendi Begës, i cili është gjithashtu bashkë-skenarist. Kasti përfshin personazhe të njohur si Egla Ceno, Kastro Zizo dhe Ledion Liço. Seriali pritet të shfaqet në orët e vona dhe është i dedikuar për audienca të rritura.

Pasaporta

Një tjetër projekt i ri është filmi “Pasaporta”, që do të shfaqet më 17 janar në Cinplexx Teg. Regjisori Eduart Grishaj sjell historinë e dy të rinjve, Edonit dhe Vlerës, të cilët duan të largohen nga Shqipëria në mënyrë ilegale. Ata lidhen me një grup mafioz që do t’i çojë në Kanada me pasaporta të falsifikuara. Rruga e tyre është e mbushur me peripeci dhe sfida, dhe ndërkohë që ata zhvillojnë një marrëdhënie dashurie, rreziku që i kanoset atyre është gjithnjë e më i madh. Ky është projekti i tretë i Eduart Grishajt, pas sukseseve të mëparshme me filmat Gjyshja dhe Sofia. Eduarti është i njohur për punën e tij si regjisor, duke trajtuar tema të rëndësishme dhe duke sjellë një vizion të ri në industrinë e kinemasë dhe televizionit shqiptar.