Ka plot teori konspirative që ndezin imagjinatën e të fiksuarve pas mistereve: zbarkimi në Hënë ishte i sajuar nga NASA, Paul McCartney ka vdekur që në 1967, sulmet e 11 shtatorit ishin një inskenim dhe njerëzit-zvarranikë sundojnë fshehurazi botën. Megjithëse disa prej këtyre teorive bien poshtë sapo i sheh me logjikë, disa të tjera kanë rezultuar të vërteta.
11. Eksperimenti i sifilizit në Tuskegee
Në vitin 1932, “U.S. Public Health Service” bashkëpunoi me “Tuskegee Institute” për të krijuar një program mashtrues trajtimi për sifilizin. Eksperimenti, i cili përfshinte gënjimin e pothuajse 400 burrave afro-amerikanë të diagnostikuar me sifiliz, fillimisht ishte parashikuar të zgjaste vetëm gjashtë muaj, por zgjati deri në vitin 1972, kur u zbulua nga publiku dhe u mbyll me detyrim.
Për 40 vite, këta burra iu nënshtruan trajtimeve të dhimbshme dhe procedurave mjekësore të panevojshme, ndërkohë që u mohohej informacioni se penicilina ishte bërë një kurë e njohur për sifilizin. Pas hetimeve, qeveria e konsideroi eksperimentin “etikisht të papërgjegjshëm” dhe në vitin 1974, një padi kolektive u mbyll me një marrëveshje prej 10 milionë dollarësh dhe me përfitime shëndetësore të përjetshme për të mbijetuarit.
10. MKUltra: Projekti i kontrollit të mendjes nga CIA
Në vitet 1950, me Luftën e Ftohtë në kulm, CIA nisi një eksperiment të fshehtë për të zbuluar një “serum të së vërtetës.” Në këtë kuadër, agjencia drogonte në mënyrë të pavetëdijshme qytetarë amerikanë dhe kanadezë me LSD dhe më pas i merrte në pyetje apo i torturonte.
CIA paguante spitale, burgje dhe universitete për të marrë pjesë në program dhe për të ruajtur heshtjen. Në vitin 1973, drejtori i CIA-s, Richard Helms, urdhëroi shkatërrimin e të gjitha dokumenteve që lidhen me MKUltra. Edhe pse skandali u zbulua, asnjë prej të përfshirëve nuk “mbante mend” detajet, duke e lënë një pjesë të madhe të historisë të pazbardhur.
9. Dëshmia e rreme e Nayirah në 1990
Në tetor të 1990-s, një 15-vjeçare me emrin Nayirah dëshmoi para Kongresit të SHBA-së duke thënë se kishte parë ushtarët irakianë të nxirrnin 15 foshnja nga inkubatorët në një spital në Kuvajt dhe t’i linin të vdisnin. Historia u transmetua në rreth 700 stacione televizive në SHBA dhe u përsërit nga Presidenti George H. W. Bush dhjetëra herë për të justifikuar ndërhyrjen ushtarake në Luftën e Gjirit.
Problemi ishte se kjo histori ishte një gënjeshtër e mirëorganizuar. CIA i kishte dhënë Nayirah mësime aktrimi para dëshmisë dhe më vonë u zbulua se ajo ishte vajza e ambasadorit të Kuvajtit në SHBA. Organizata “Amnesty International” akuzoi administratën Bush për “manipulim të lëvizjeve ndërkombëtare për të drejtat e njeriut.”
8. Operacioni “Snow White”: Përplasja e “Church of Scientology” me qeverinë amerikane
Në vitet 1970, rreth 5,000 agjentë të fshehtë të “Church of Scientology” ndërmorën një nga operacionet më të mëdha të infiltrimit në historinë amerikane, duke depërtuar në 136 institucione, përfshirë IRS, DEA, ambasada të huaja dhe agjenci të tjera shtetërore. Qëllimi ishte mbrojtja e kishës dhe shmangia e taksave që do të duhej të paguanin.
Në korrik të 1977-s, FBI organizoi një bastisje të gjerë në disa zyra të “Church of Scientology”, duke zbuluar dokumente që vërtetonin aktivitetet e paligjshme të grupit. Në vitin 1979, 11 anëtarë të rangut të lartë, përfshirë Mary Sue Hubbard (bashkëshortja e L. Ron Hubbard), u dënuan me pesë vjet burg. Vetë Hubbard mbeti një “bashkëpunëtor i pahetuar” dhe kaloi pjesën e mbetur të jetës në arrati.
7. Vrasjet nga CIA
Pas skandalit Watergate, senatori Frank Church krijoi një komision për të hetuar veprimet e CIA dhe FBI, duke zbuluar një rrjet ekzekutimesh sekrete të organizuara nga CIA.
Agjencia ishte përfshirë në eliminimin e liderëve si Mossadegh në Iran dhe Allende në Kili, si dhe figurave të tjera në Amerikën Latine, Afrikë, Lindjen e Mesme dhe Azi. Metodat përfshinin vrasje që dukeshin si aksidente, vetëvrasje apo sëmundje të natyrshme. CIA kishte krijuar madje edhe një “pistoletë për sulme në zemër,” e cila shkaktonte sulme kardiake pa lënë gjurmë.
6. The Business Plot
Në vitin 1933, një grup biznesmenësh të fuqishëm nga kompani si “Chase Bank”, “Goodyear”, “Standard Oil”, “GM” dhe familja Du Pont, organizuan një plan për të rrëzuar Presidentin Franklin D. Roosevelt dhe për të vendosur një diktaturë fashiste.
Ata rekrutuan gjeneralin e njohur të Marinës, Smedley Butler, pa e ditur se ai ishte një mbështetës i FDR. Butler, në vend që të bashkohej me ta, i denoncoi dhe paraqiti prova para një komisioni të Kongresit. Megjithëse komploti u konfirmua, asnjë nga të përfshirët nuk u ndoq penalisht.
5. Operacioni Mockingbird: Makineria propagandistike e CIA-s
Në vitin 1948, CIA krijoi një program të fshehtë për të ndikuar në mediat globale dhe për të përhapur propagandë kundër komunizmit.
CIA kontrollonte gazetarë nga The New York Times, Newsweek, CBS dhe shumë media të tjera. Në vitin 1975, Komisioni Church zbuloi këtë skandal dhe arriti në përfundimin se programi i propagandës kushtonte rreth 265 milionë dollarë në vit nga taksapaguesit amerikanë.
4. COINTELPRO: FBI kundër aktivistëve të viteve ’60
Nga 1956 deri në 1971, FBI përdori programin COINTELPRO për të infiltruar, sabotuar dhe diskredituar lëvizjet e të drejtave civile, të drejtave të grave dhe organizatat e indianëve amerikanë.
3. Operacioni Paperclip: Shkencëtarët nazistë punësohen nga SHBA
Pas përfundimit të Luftës së Dytë Botërore, SHBA nisi një operacion të fshehtë të quajtur Paperclip, me qëllim rekrutimin e shkencëtarëve më të aftë të regjimit nazist për të ndihmuar në avancimin e teknologjisë ushtarake dhe hapësinore amerikane.
Më shumë se 1,500 shkencëtarë gjermanë u sollën fshehurazi në SHBA, përfshirë Wernher von Braun, një nga arkitektët kryesorë të programit hapësinor amerikan. Për të shmangur ndjekjen penale të këtyre individëve për krimet e tyre gjatë Luftës së Dytë Botërore, Office of Strategic Services (OSS) falsifikoi dosjet e tyre dhe i paraqiti si “të pastër” për punësim në agjencitë qeveritare amerikane.
Një pjesë e këtyre shkencëtarëve kishte punuar drejtpërdrejt për regjimin nazist në eksperimente çnjerëzore, por qeveria amerikane i mbrojti me justifikimin se ndihma e tyre ishte e domosdoshme për të fituar Luftën e Ftohtë kundër Bashkimit Sovjetik.
2. Operacioni Northwoods: Komploti për të nisur një luftë me Kubën
Në vitin 1962, Joint Chiefs of Staff, organi më i lartë ushtarak në SHBA, hartoi një plan të fshehtë të quajtur Operation Northwoods, i cili përfshinte inskenimin e një sërë sulmesh terroriste brenda SHBA-së për të fajësuar qeverinë kubane dhe për të justifikuar një pushtim ushtarak.
Plani përfshinte ide si:
• Rrëzimin e një avioni civil amerikan dhe paraqitjen e tij si një akt terrorist nga Kuba.
• Organizimin e një sulmi mbi një anije ushtarake amerikane.
• Inskenimin e akteve terroriste në qytete të ndryshme të SHBA-së për të krijuar panik në publik.
Presidenti John F. Kennedy, pasi u informua për këtë plan, e refuzoi me vendosmëri dhe shkarkoi kreun e Joint Chiefs of Staff, gjeneralin Lyman Lemnitzer. Dokumentet mbi operacionin Northwoods mbetën sekrete deri në vitin 1997, kur u deklasifikuan nga Arkivat Kombëtare të SHBA-së.
1. Bohemian Grove: Sekretet e elitës globale
Bohemian Grove është një kompleks ekskluziv në Kaliforni, ku çdo vit, gjatë dy javëve të korrikut, mblidhen disa nga figurat më të fuqishme të botës, përfshirë presidentë amerikanë, CEO të korporatave të mëdha dhe liderë të industrisë financiare.
Kjo shoqëri elitare ka nxitur shumë teori konspirative për shkak të ritualeve të saj misterioze dhe sekreteve që e rrethojnë. Për shembull, një nga ceremonitë e përvitshme quhet Cremation of Care, ku një statujë e madhe e një bufi adhurohet në një skenë teatrale, në të cilën anëtarët e klubit djegin simbolikisht një figurë që përfaqëson “brengën dhe përgjegjësitë e tyre.”
Megjithëse anëtarët e klubit e kanë përshkruar këtë event si një “shaka mes miqsh,” kritikët besojnë se këto takime janë vendi ku merren vendime kyçe për politikën dhe ekonominë globale, larg syrit të publikut. Presidentë si Richard Nixon, Ronald Reagan, George H.W. Bush dhe Bill Clinton kanë marrë pjesë në këto takime.
Në vitin 2000, gazetari Alex Jones arriti të infiltronte Bohemian Grove dhe publikoi pamje të njërit prej ritualeve, duke forcuar edhe më shumë dyshimet mbi natyrën e vërtetë të këtyre mbledhjeve.
Burime: Howstuffworks
