Adrenalinë, aventura, kamera të fshehta dhe sfida nga më të çuditshmet – ja çfarë mund të prisni nga “O me 3, O me 8”, emisioni më i ri online, prodhim i Andale Media. Djemtë e Andale-s (shpesh në shoqërinë e vajzave) mund t’i shihni jashtë studiove, jashtë normave dhe jashtë orbitës.
“Ne gjithmonë argëtohemi duke xhiruar. Urojmë që ju të argëtoheni duke na ndjekur.” – Fabio Çani, autor i programit.
Asnjë ide nuk është jashtë kufijve për djemtë e “O me 3, O me 8”. T’i kërkojnë njerëzve të fusin shokun e tyre në bagazh? Patjetër! Të vrapojnë tapë në maratonë? Pa problem! Të kalojnë natën jashtë, në mal, në mes të dimrit? Lart fare!
Njihuni me ekipin e çunave të çmendur:
Aldi
“Mos e thirr policinë!!!”
Kur ndizen kamerat, Aldi nuk njeh më asgjë përveç spektaklit. Kur ai ka një sfidë për të kryer, turpi dhe frika dalin jashtë loje. Nëse e shihni në rrugë, ai nuk është i çmendur, thjesht po bën prova për në emision.
Flori
“Do kamuflohem si një kafshë. Mjauuu…”
Jeni mësuar ta shihni në emisionin e sportit, por ai ka shumë më shumë për të dhënë. Superfuqia e tij? Të tregohet profesionist edhe në sfidat më idiote. Gjithmonë sjell karizëm, ide të reja dhe energji pozitive në ekran.
Eno “Messi”
“Ça ke që sheh si i keq?”
Eno nuk ka filtra. Gjithçka që ai mendon, e thotë me zë të lartë, si pas dhe para kamerës. Çun danoç 24 karatsh. Kur e shihni që po nis të flasë, largoni fëmijët dhe të moshuarit nga ekrani.
Xhastin
“Ritëm zemra, jepi ritëm!”
Nëse mendoni se e dini cila është lëvizja e radhës e Xhastinit, e keni gabim (jo për gjë, por nuk e dimë as ne). I paparashikueshëm dhe super energjik.
Benard
“Shifeni babën, t’ju mësoj si luhet ky sport.”
Benardi është përgjegjës për audiencën femërore të emisionit. Plot me vetëbesim dhe shpirt konkurrues, ai nuk i shmanget asnjë gare… sidomos kur bëhet fjalë për të fituar lekë.
Ja disa nga momentet më gallatë të “O me 3, o me 8”:
#1 U punojnë një rreng kalimtarëve dhe ata thërrasin policinë.
#2 Sillen si të çmendur në furgonin e Lezhës. Ja reagimet e pasagjerëve.
#3 Kalojnë një natë dimri në mal.
#4 Luajnë hapa dollapa për të fituar €1000.
#5 “Shesin pordhë” për të siguruar sa më shumë para.
Ndiqni “O me 3, O me 8” në Youtube-in e Andale Media. Episode premierë çdo të enjte, në orën 21:00.
