Ukraina pranon armëpushimin e menjëhershëm 1-mujor të propozuar nga SHBA-ja
Ukraina ka rënë dakord të pranojë një armëpushim të menjëhershëm 30-ditor të propozuar nga SHBA, në pritje të pranimit të të njëjtave kushteve nga Moska, sipas një deklarate të përbashkët nga zyrtarët të martën në mbrëmje.
"Të dy delegacionet ranë dakord të emërojnë ekipet e tyre negociuese dhe të fillojnë menjëherë negociatat drejt një paqeje të qëndrueshme që siguron paqen afatgjatë të Ukrainës."
Sekretari amerikan i Shtetit, Marco Rubio, i cili do ta çojë propozimin në Moskë, u tha gazetarëve se "topi është në fushën e rusëve" dhe se nëse Kremlini nuk pajtohet me marrëveshjen, "për fat të keq do ta dimë se cila është pengesa për paqen".
Parlamenti i Portugalisë refuzon mocionin e besimit dhe rrëzon qeverinë
Mocioni i besimit ndaj qeverisë u refuzua nga Kuvendi të martën në mbrëmje, rreth një vit pas zgjedhjeve legjislative të 2024-ës. PS, Chega, Bloco de Esquerda (BE), PCP, Livre dhe PAN votuan kundër, duke rrëzuar qeverinë. Nisma Liberale (IL) ishte e vetmja parti opozitare që votoi pro.
Gjatë debatit, kryeministri Luis Montenegro u bëri disa thirrje partive opozitare për të gjetur një zgjidhje, por PS nuk u tërhoq.
Edhe socialdemokratët e qendrës së djathtë paraqitën një kërkesë për të pezulluar debatin në mënyrë që kryeministri të bisedonte privatisht me liderin e opozitës, por pa rezultat.
Trump thotë se do të dyfishojë tarifat për çelikun dhe aluminin kanadez në 50%
Presidenti amerikan Donald Trump njoftoi të martën se synon të dyfishojë tarifat e planifikuara për çelikun dhe aluminin kanadez nga 25% në 50%.
Në një postim në platformën e tij të mediave sociale “Truth Social”, ai tha se tarifat do të hyjnë në fuqi të mërkurën, duke e quajtur vendimin një përgjigje ndaj rritjes së çmimeve që Ontario vendosi për energjinë elektrike të eksportuar në Shtetet e Bashkuara.
Trump po përballet me presion të shtuar për të treguar se ka një plan legjitim për të rritur ekonominë në vend që ta shtyjë atë në një recesion.
Von der Leyen: “Siguria e BE-së në krizë”
Kryetarja e Komisionit të BE-së, Ursula von der Leyen, mbajti fjalën në seancën plenare të PE për RearmE, ku theksoi se vendet e unionit duhet të unifikohen përballë krizës me të cilën po përballen.
Ajo tha se tani është koha për të krijuar një mbrojtje të përbashkët.
“Paqja në Bashkimin tonë nuk mund të merret më si e mirëqenë. Ne po përballemi me një krizë të sigurisë europiane. Por ne e dimë se Europa është ndërtuar gjithmonë në kriza. Pra, kjo është koha për paqe përmes forcës. Është koha për një mbrojtje të përbashkët. Më shumë guxim do të nevojitet në javët dhe muajt e ardhshëm. Ndaj zgjedhje më të vështira na presin. Koha e iluzioneve ka mbaruar.”, tha Von der Leyen.
