Një bisedë e gjatë me një mik të mirë mund të na përmirësojë ditën në çast. Madje, është vërtetuar se një ndërveprim i vetëm pozitiv në ditë me një mik mund të rrisë mirëqenien tonë mendore. Por nga ana tjetër, një bisedë e sikletshme mund të na lërë me mendime stresuese për ditë me radhë. Atëherë, si mund të sigurohemi që çdo bisedë të shkojë sa më mirë? Nuk ka një formulë magjike, por ka disa gabime që mund të shmangim për t’u lidhur më mirë me të tjerët.

Pse është e rëndësishme mënyra si komunikojmë?

Përpara se të analizojmë gabimet e zakonshme që bëjmë, le të qartësojmë pse ky aspekt është kaq i rëndësishëm. Siç mund ta imagjinoni, bisedat tona ndikojnë drejtpërdrejt në marrëdhëniet tona - për mirë ose për keq.

Sipas psikologes Meghan Marcum, “gabimet në komunikim shpesh krijojnë një ndjenjë shkëputjeje dhe mund të çojnë në probleme në marrëdhënie”. Kjo vlen si për raportet personale, ashtu edhe për ato profesionale, pasi shumica e ndërveprimeve tona bazohen tek aftësia për të komunikuar. Nëse këto gabime përsëriten shpesh, pasojat negative mund të jenë të pashmangshme.

Gabimet më të zakonshme në biseda

1. “Boomerasking”

Keni bërë ndonjëherë një pyetje vetëm për të pasur mundësinë të përgjigjeni vetë? Ky veprim nuk konsiderohet vetëm i pasjellshëm, por mund të duket edhe manipulues, pasi e përdorim një temë thjesht si trampolinë për të folur për veten. Kjo i lë të tjerët me ndjesinë se nuk po i marrim seriozisht.

2. Ndërprerja e tjetrit

Të qëndrosh në heshtje kur ke diçka për të thënë është e vështirë, por ndërprerja e dikujt është përgjithësisht e konsideruar si ofenduese. Sigurisht, ka marrëdhënie ku të dyja palët e bëjnë dhe nuk shqetësohen, por këto janë më shumë përjashtime sesa rregull. Në shumicën e rasteve, ndërprerja e dikujt e bën atë të ndihet i pavlerësuar dhe i shpërfillur.

3. Të flasësh shumë për veten

E kemi dëgjuar të gjithë historinë - ose e kemi përjetuar - kur dikush nuk ndalon së foluri për jetën e tij, pa e lënë tjetrin të marrë frymë. Kjo jo vetëm që është e mërzitshme, por i jep ndjesinë bashkëbiseduesit se nuk ka rëndësi në atë bisedë. Një bisedë e shëndetshme ka ekuilibër mes ndarjes dhe dëgjimit.

4. Dhënia e tepërt e këshillave

Kur një mik apo familjar na rrëfen një problem, instinkti ynë i parë është t’i japim një zgjidhje. Por ndonjëherë, ata thjesht duan të shfryhen, jo të marrin sugjerime. Sipas ekspertes Dana Caspersen, një nga gabimet më të mëdha në komunikim është “ndërhyrja me këshilla, në vend që të dëgjojmë dhe të njohim përvojën e personit tjetër”.

5. Pyetjet shteruese

Bërja e pyetjeve është thelbësore në një bisedë të mirë, por mënyra si i formulojmë ka rëndësi. Pyetjet e mbyllura/shteruese (ato që kanë përgjigje me “po” ose “jo”) mund ta vrasin bisedën, sepse nuk lejojnë vazhdimësinë e saj. Për shembull, në vend të “Të pëlqen kjo pije?”, një pyetje më e mirë do të ishte “Çfarë të pëlqen te kjo pije?”.

6. Mungesa e pyetjeve pasuese

Nëse bëjmë një pyetje dhe, pas përgjigjes, kalojmë menjëherë në një temë tjetër, bashkëbiseduesi mund të ndihet sikur po flasim thjesht për të mbushur kohën dhe jo sepse na intereson vërtet. Pyetjet pasuese tregojnë vëmendje, interes dhe kujdes për atë që po na thotë personi tjetër.

7. Bisedat si marrje në pyetje

Biseda duhet të jetë një shkëmbim i ndërsjellë, jo një intervistë apo një proces hetimor. Edhe nëse i bëjmë pyetjet me një ton të butë, një fluks i pandërprerë pyetjesh mund ta bëjë tjetrin të ndihet në siklet apo i vënë në vëzhgim. Askush nuk dëshiron të ndihet si në një sallë gjyqi gjatë një bisede miqësore.

Si të bëhemi bashkëbisedues më të mirë?

Komunikimi i mirë nuk ka të bëjë me përsosmërinë, por me ndërgjegjësimin dhe përpjekjen për të bërë biseda më të natyrshme dhe të këndshme. Duke shmangur këto gabime të zakonshme, mund të krijojmë marrëdhënie më të mira dhe biseda më të frytshme. Fundja, një bisedë e mirë është ajo ku të dyja palët ndihen të dëgjuara dhe të vlerësuara.