Të paktën 1,644 viktima pas një tërmeti të fuqishëm që tronditi Mianmarin

Numri i të vdekurve në Mianmar nga tërmeti me magnitudë 7.7 të së premtes është rritur në 1,644, raporton gjencia e lajmeve AFP.

Tërmeti tronditi qytetin qendror të Mianmarit, Mandalay, rreth mesditës me orën lokale, duke shkaktuar dëme të mëdha në një zonë të gjerë të një prej vendeve më të varfra në botë.

Autoritetet thonë se 2,376 janë plagosur dhe 30 të tjerë janë të zhdukur.

Izraeli zgjeron operacionet tokësore në Gaza

Ushtria izraelite ka njoftuar një përshkallëzim të ofensivës së saj tokësore në rajonin jugor të Rripit të Gazës.

Forcat ushtarake kanë avancuar në lagjen al-Jenine të Rafah si pjesë e iniciativës së tyre për të "zgjeruar zonën e sigurisë" përgjatë kufijve.

IDF thotë se trupat e saj po vazhdojnë të shkatërrojnë me sukses infrastrukturën dhe objektivat e Hamasit. Në një postim në X, ata njoftuan se u shkatërruan disa objektiva të Hamasit, duke përfshirë depo armësh, raketahedhës dhe ndërtesa që shërbenin si objekte ushtarake.

Mijëra njerëz marrin pjesë në tubimin në Stamboll kundër arrestimit të kryebashkiakut Ekrem Imamoglu

Qindra mijëra protestues janë mbledhur në Stamboll në mbështetje të kryebashkiakut të burgosur të qytetit dhe kërkojnë lirimin e tij.

Partia kryesore opozitare e Turqisë, Partia Popullore Republikane (CHP) organizoi demonstratën, e fundit në një seri protestash që kanë rezultuar në qindra arrestime dhe kanë shtuar presionin ndaj liderit të vendit, Rexhep Tajip Erdogan.

Kryetari i Bashkisë së Stambollit Ekrem Imamoglu, një rival kryesor politik i Erdoganit, u arrestua më 19 mars me akuza për korrupsion dhe terrorizëm që shumë i panë si të motivuara politikisht.

Dyshime për atentat ndaj presidentit rus, Vladimir Putin

Një limuzinë “Aurus Senat” prej 275,000 £, që besohet të jetë nga flota zyrtare e makinave të presidentit rus Vladimir Putin, raportohet se shpërtheu dhe mori flakë në një rrugë në Moskë pranë selisë së agjencisë më të lartë të inteligjencës të vendit FSB.

Një video e supozuar e shpërthimit të supozuar është bërë virale në mediat sociale, duke çuar në spekulime për një atentat ndaj liderit rus mes bisedimeve të mbështetura nga Shtetet e Bashkuara për t'i dhënë fund luftës së Moskës në Ukrainë.

Ngjarja raportohet të ketë ndodhur me 30 mars, teksa ende nuk është e qartë nëse bëhet fjalë për një atentat apo është vetëm një aksident.