Kinema & TV

Ndahet nga jeta ikona e kinematografisë shqiptare, Margarita Xhepa

Shkruar nga Anabel

3 Prill 2025

Ndahet nga jeta ikona e kinematografisë shqiptare, Margarita Xhepa

Ylli i kinematografisë shqiptare, Margarita Xhepa, është shuar në moshën 93-vjeçare. Ikona e filmave shqiptarë dha frymën e fundit vetëm një ditë pasi festoi ditëlindjen e saj. Ajo u nda nga jeta, por vepra që la pas ka lënë gjurmë të pashlyeshme në kinematografi, duke përjetësuar kujtimin e saj.

Margarita Xhepa u lind më 2 prill të vitit 1932, në qytetin e Lushnjës, vend ku nisi edhe hapat e parë drejt aktrimit. Gjatë karrierës së saj, ajo ka krijuar mbi 150 role në teatër dhe 32 role në kinematografi.

Në maj të vitit 2004, u rikthye në skenën e Teatrit Kombëtar për të shkëlqyer në dramën “Streha e të harruarve”, një tjetër sukses në karrierën e saj 50-vjecare.

Ndahet nga jeta ikona e kinematografisë shqiptare, Margarita Xhepa

Në vitin 1997, interpretoi në filmin grek “Mirupafshim” (regjisor J. Koras, K. Vupuras). Filmi u vlerësua me Çmimin e Madh në Festivalin Ndërkombëtar të Filmit Mesdhetar në Selanik, ndërsa Margarita Xhepa u vlerësua me Çmimin e Nderit.

Margarita Xhepa është nëna e Sokol dhe Ndricim Xhepës, ky i fundit i konsideruar si një nga aktorët më të mirë në vitet ’80. Dy fëmijët erdhën në jetë nga martesa me aktorin, Xhavit Xhepa, i cili ndërroi jetë kur aktorja ishte 52-vjeç.

Rolet dhe kontributi i saj në kinematografi janë të shumta, gjë e cila e ktheu dhe në një ndër të preferuarat e publikut, i cili do të duartrokasë kurdoherë kujtimin dhe punën e saj.

Ndahet nga jeta ikona e kinematografisë shqiptare, Margarita Xhepa