SHBA në bisedime të drejtpërdrejta bërthamore me Iranin, thotë Trump
SHBA dhe Irani do të zhvillojnë “bisedime të drejtpërdrejta” mbi një marrëveshje të mundshme bërthamore të shtunën, thotë Donald Trump.
Takimi është konfirmuar edhe nga ministri i jashtëm i Iranit, i cili e quajti atë "sa një mundësi aq edhe një provë".
Presidenti amerikan tha të hënën se diskutimet midis Uashingtonit dhe Teheranit do të ishin në "nivel shumë të lartë" dhe paralajmëroi se do të ishte një "ditë shumë e keqe për Iranin" nëse nuk arrihet marrëveshje.
Gjykata e Apelit në SHBA refuzon kërkesën e Trump për të përshpejtuar dëbimet e emigrantëve
Një gjykatë apeli në SHBA refuzoi të hënën kërkesën e Trump për të hequr ligjin që ndalon administratën Trump nga deportimi i emigrantëve.
Një panel prej tre gjyqtarësh i Gjykatës së Parë të Apelit të Rrethit të SHBA-së me bazë në Boston mori vendimin, duke rrëzuar kështu kërkesën e Trump.
Urdhri ka penguar qeverinë për të përshpejtuar deportimin e mijëra emigrantëve që nuk mund të dërgohen në vendet e tyre të origjinës, në disa raste sepse njerëzit kanë mbrojtje ligjore kundër një lëvizjeje të tillë.
Numri i të vdekurve nga tërmeti i 28 marsit në Mianmar shkon mbi 3500
Numri i të vdekurve nga tërmeti shkatërrues i muajit të kaluar në Mianmar është rritur mbi 3500, pasi mundësia për të gjetur të mbijetuar bëhet gjithnjë e më e pamundur.
Ekipet e shpëtimit nga India, Malajzia dhe Singapori janë kthyer në vendet e tyre pasi kanë përfunduar punën e tyre, tha të hënën departamenti i shërbimeve zjarrfikëse të Mianmarit.
Ai shtoi se 10 trupa u gjetën së fundmi nga rrënojat e një ndërtese të shembur në Mandalay, qyteti i dytë më i madh i Mianmarit, i cili ndodhet afër epiqendrës së tërmetit 7.7 ballë që goditi vendin më 28 mars.
Gjermania paralajmëron SHBA-në: “Nuk do i rezistoni dot tarifave doganore”
Tregjet financiare globale kanë hyrë në një fazë shqetësuese, me një humbje kolosale prej 9.500 miliardë dollarësh të regjistruar në vetëm tre ditë. Si pasojë, Gjermania ka dalë me një deklaratë të fortë ndaj Shteteve të Bashkuara të Amerikës.
Ministri gjerman i Ekonomisë, Robert Habeck, deklaroi sot nga Brukseli, në përfundim të Këshillit të Tregtisë së BE-së, se presioni më i madh në krizën aktuale është mbi SHBA-të, duke parashikuar se vendi nuk do të mund të rezistojë gjatë përballë një kombinimi tejet të rrezikshëm të faktorëve ekonomikë.
“Presioni është para së gjithash mbi amerikanët. SHBA mund të përballet me një recesion të thellë të shoqëruar me inflacion të lartë – një përzierje toksike për çdo shoqëri të hapur,” u shpreh Habeck.
