Prada njoftoi sot, më 2 dhjetor, se kishte përfunduar blerjen e Versace-s, një markë që grupi italian i luksit tha se e kishte dëshiruar prej kohësh. Prada nënshkroi një marrëveshje përfundimtare në prill për të blerë Versace-n nga kompania amerikane Capri Holdings për rreth 1.3 miliardë euro (1.51 miliardë dollarë).
Lorenzo Bertelli, djali i pronarëve të Prada-s, Miuccia Prada dhe Patrizio Bertelli, i tha Reuters në nëntor se ai do të bëhet kryetar ekzekutiv i Versace-s, sapo blerja të përfundonte. Ai tha se Prada kishte qenë e interesuar për këtë marrëveshje prej vitesh me radhë.
“Kontakte ka pasur që gjatë periudhës së COVID-it, pati biseda edhe para se Capri të shitej për Tapestry. Kur ajo marrëveshje dështoi për shkak të çështjeve të konkurrencës, ne u rikthyem dhe përpoqëm ta shpejtojmë procesin,” tha Lorenzo Bertelli.
E themeluar në vitin 1978 nga Gianni Versace në Milano, marka e njohur për estetikën e saj të guximshme do t’i bashkohet dy markave kryesore të grupit: Prada dhe Miu Miu. Sa i përket Miu Miu-t, është një markë e vogël, por që po rritet me ritme shumë të shpejta, duke shënuar një ndryshim të rëndësishëm strategjik për shtëpinë italiane të modës.
Bertelli, i cili e nxiti fuqishëm për këtë blerje, tha se Versace përmbushi dy kushte kyçe:
- që të mos ishte shumë e rrezikshme financiarisht
- që ia vlente, duke pasur parasysh se marka renditet ndër liderët botërorë në industrinë e modës.
Në mars, disa javë para se të njoftohej marrëveshja me Prada-n, Donatella Versace dha dorëheqjen nga pozicioni i drejtores kreative, pas pothuajse tre dekadash në këtë rol. Dario Vitale, më parë drejtor dizajni te Miu Miu, e zëvendësoi.
