Ditën e djeshme qarkulluan lajme se Laert Vasili, opinionist i emisionit “Përputhen”, ishte përjashtuar nga programi. Nuk vonoi shumë dhe ai reagoi në mënyrë të tërthortë përmes një story në Instagram. Edhe pse nuk ka komentuar ende mbi asgjë, zgjedhja e fotos dhe e këngës duket mjaft interesante.
Ai ka ndarë një foto nga episodi i fundit i "Përputhen", i cili ka qenë i regjistruar më parë. Laerti shfaqet i ulur në kolltukun e opinionistit, teksa në sfond dëgjohet kënga “The Godfather”.
Për t'ju dhënë kontekst, titulli i këngës lidhet me temën e njohur të filmit “The Godfather”, me muzikë nga Nino Rota, e përdorur fillimisht në filmin e publikuar në vitin 1972.
Ky film, me regjisor Francis Ford Coppola, tregon historinë e familjes mafioze Corleone në New York. Don Vito Corleone është patriarku i fuqishëm që kontrollon botën e krimit, ndërsa djali i tij, Michael, gradualisht përfshihet në biznesin familjar pas një atentati kundër babait. Filmi trajton pushtetin, besnikërinë, tradhtinë dhe moralin, duke krijuar një pasqyrë të jetës mafioze, por edhe të marrëdhënieve brenda familjes së Don Vito Corleone. Në thelb të filmit qëndron familja, interesi dhe besnikëria ndaj saj.
Në rastin e Laertit, përmes fotos ku shfaqet i ulur në kolltuk, ai lë të kuptohet se ndoshta vazhdon të ruajë të njëjtën fuqi. “Familja” për të mund të jetë vetë televizioni ku bën pjesë, apo programi, për të cilin ende nuk ka thënë asgjë, pavarësisht çdo gjëje që është thënë mbi të.
Muzika e përzgjedhur është pa tekst dhe me një melodi pak nostalgjike, e cila i përshtatet një atmosfere dramatike. E njëjta atmosferë është krijuar edhe mbi lajmet që qarkullojnë rreth tij, ndaj të cilave nuk ka reaguar drejtpërdrejt. Ndoshta sepse nuk i intereson, ose për të treguar se qëndron mbi çdo zë që flet kundër tij.
Ditën e djeshme, sipas burimeve për Revista Class, Laerti kishte puthur në buzë në mënyrë të papritur një nga konkurrentet, veprim i cili kishte çuar në përjashtimin e tij të menjëhershëm nga programi. U pretendua se e gjitha kjo kishte ndodhur gjatë regjistrimit në studio, duke zënë në befasi të gjithë të pranishmit.
Anabel.al kontaktoi me Laert Vasilin për një reagim lidhur me aludimet, por ai preferoi të mos komentonte, duke thënë vetëm se na donte shumë.
