A të ka ndodhur ndonjëherë të nisësh një lidhje që duket premtuese, gjithçka shkon mirë, seksi është i mrekullueshëm, njësoj dhe komunikimi? Kaloni kohë bashkë, keni interesa të përbashkëta dhe gjithçka duket gati për të kaluar në një fazë më serioze, derisa papritur fillon të të pushtojë një ndjesi ftohjeje dhe presioni, e ndoshta edhe një dëshirë për t’i dhënë fund.
Nëse kjo situatë të tingëllon e njohur, mund të jesh duke përjetuar frikë nga intimiteti apo angazhimi emocional, një dinamikë e zakonshme tek ata që kanë kaluar trauma në fëmijëri, ndarje të dhimbshme, ose janë rritur me idenë se shprehja e ndjenjave është dobësi.
Sipas Alison Gomez, terapiste për marrëdhëniet dhe martesën, trauma emocionale në moshë të vogël ndikon drejtpërdrejt në mënyrën se si i përjetojmë lidhjet në jetën e mëvonshme.
"Nëse një fëmijë është rritur duke besuar se emocionet janë të rrezikshme apo të turpshme, ai do të mësojë t’i fshehë ato, edhe si i/e rritur," shpjegon ajo.
5 shenja që nuk duhen injoruar:
1. Nuk i ndan ndjenjat e tua të vërteta
Kur diçka të shqetëson, nuk e ndan me partnerin, jo sepse nuk të intereson, por sepse ndihesh e pasigurt. Mund të kalosh vite në një marrëdhënie pa u hapur kurrë vërtet. Fshehja e emocioneve duket si mënyra më e sigurt për të shmangur zhgënjimin, por në fakt të pengon të krijosh lidhje të thella.
2. Nuk ndan problemet e tua personale
Ashtu si emocionet, edhe sfidat që përjeton, në punë, me familjen apo edhe brenda vetë marrëdhënies, i përballon vetëm. Nuk kërkon ndihmë, nuk hapesh, sepse ndihesh më e sigurt kur ke kontroll të plotë. Kjo e bën partnerin të ndihet i përjashtuar, ndërkohë që ti ndihesh e vetme.
3. Shmang marrëdhëniet serioze dhe afatgjata
Në vend të lidhjeve të thella, ke pasur më shumë përvoja të shkurtra, pa shumë angazhim. Flirtet dhe marrëdhëniet e tilla duken më të sigurta, sepse nuk kërkojnë të tregosh veten plotësisht. Edhe kur je në një lidhje më të gjatë, mund të jesh emocionalisht i distancuar.
4. Edhe lidhjet shoqërore janë të kufizuara
Frika nga intimiteti nuk prek vetëm jetën romantike. Shpesh, ajo shfaqet edhe në miqësi. Mund të kesh shokë/sjpqe, por nuk lidhesh thellësisht. Nuk ndihesh rehat të ndash brengat apo ndjesitë e tua dhe shpesh vendos barriera të padukshme që të ruajnë “hapësirën tënde emocionale”.
5. Kur gjërat bëhen të vështira, tërhiqesh
Në vend që të kërkosh mbështetje kur përballesh me vështirësi, tërhiqesh. Mbyllesh. Nuk ndan asgjë me askënd, as me partnerin, as me familjen, as me miqtë. Dhe kjo të jep një ndjenjë të rreme sigurie, ndërkohë që në thelb vetëm e thellon ndjesinë e vetmisë.
Çfarë mund të bësh?
Frika nga intimiteti nuk është një dënim i përjetshëm, është një lëndim emocional që mund të shërohet, me kohë, vetëdije dhe ndihmë. Hapi i parë është ta pranosh, dhe më pas të fillosh të krijosh hapësira të sigurta ku mund të jesh vetvetja.
Nëse e gjendesh shpesh në këto situata, mos e fajëso veten. Reflekto, fol me dikë, kërko ndihmë profesionale nëse ke mundësi. Sepse ndonjëherë, ajo që duket si vetëmbrojtje, është në fakt një formë e vetmisë që nuk e meriton.
