Gati dy dekada më parë, bota e modës dhe ajo e filmit u bashkuan në një mënyrë që la gjurmë në histori. Në vitin 2004, Chanel publikoi "No. 5 The Film", një reklamë ikonike për parfumin legjendar Chanel No. 5, me protagoniste aktoren fituese të çmimit Oscar, Nicole Kidman, nën regjinë e të jashtëzakonshmit Baz Luhrmann.
E njohur si reklama televizive më e shtrenjtë e të gjitha kohërave, prodhimi kushtoi plot 33 milionë dollarë, shifër që sot do të barazohej me rreth 52 milionë dollarë. Spoti zgjat vetëm 3 minuta, çka do të thotë se çdo sekondë e tij kushtoi mesatarisht 275,000 deri në 288,000 dollarë. Por çdo qindarkë rezultoi e justifikuar.
Estetika e reklamës ishte një bashkim i përsosur mes luksit që karakterizon Chanel dhe stilit romantik e teatror të “Moulin Rouge!”, nga vetë regjisori Luhrmann. Nicole Kidman interpreton një yll të famshëm të filmit që përpiqet t’i shpëtojë botës së dritave për të përjetuar një histori dashurie të ndaluar me një të panjohur, roli i të cilit luhet nga aktori brazilian Rodrigo Santoro.
Kidman u pagua midis 3 dhe 3.7 milionë dollarë për rolin, teksa mbante veshur një krijim magjepsës të modës së lartë, stiluar nga Karl Lagerfeld, atëherë drejtor artistik i Chanel dhe përgjegjës për drejtimin artistik të gjithë fushatës.
Muzika e zgjedhur për kolonën zanore ishte një pjesë nga Claude Debussy, e cila i shtoi edhe më shumë hijeshi dhe elegancë këtij produksioni kinematografik të jashtëzakonshëm.
