Një moment i transmetuar në “Për’Puthen” ka ndezur reagime të forta në rrjet. Në program, njërit prej konkurrentëve iu bë një rreng, duke pretenduar se emri i tij ishte gjetur në dosjet Epstein, një çështje që prej kohësh është në qendër të diskutimeve globale për shkak të akuzave dhe të dhënave tronditëse që lidhen me abuzimin dhe trafikimin e të miturve.
Edhe pse situata u paraqit si një “lojë” brenda formatit, publiku nuk e priti aspak mirë. Në komentet në Instagram, jo pak ndjekës e cilësuan të papërshtatshme përdorimin e një teme kaq të ndjeshme për një rreng. “Nuk bëhen shaka me tema të tilla”, shkruan një komentues. Një tjetër shton: “Ç’ka për të qeshur kur flitet për fëmijë të përdhunuar dhe torturuar?”
Të tjerë e konsideruan momentin si mungesë ndjeshmërie, duke theksuar se rasti Epstein nuk është thjesht një trend, por një çështje e rëndë që përfshin viktima reale dhe histori traumatike.
Deri më tani, nuk ka një reagim zyrtar nga produksioni lidhur me kritikat.
Termi dosjet Epstein i referohet një arkive masive prej më shumë se 6 milionë faqe dokumente, fotografi dhe komunikime të lidhura me hetimin e Jeffrey Epstein, rrjetin e tij shoqëror dhe aktivitetet që lidhen me abuzimin seksual dhe trafikimin e viktimave, kryesisht të mitur.
Këto dokumente janë mbledhur nga FBI dhe Departamenti i Drejtësisë së SHBA (DOJ) si pjesë e një hetimi që zgjati dekada dhe që përfshijnë materiale nga vëzhgimet, komunikimet, regjistrat e fluturimeve dhe provat ligjore që lidhen me Epstein dhe bashkëpunëtorët.
