Aktorja Sophia Bush ka rrëfyer se është përballur me "të gjitha llojet e trajtimit fyes" gjatë xhirimeve të një seriali televiziv, në një intervistë të fundit për podkastin “Reclaiming” të Monica Lewinsky.
Edhe pse Bush nuk e përmendi drejtpërdrejt emrin e serialit, komentet e saj, përfshirë përmendjen e datës së largimit, lënë të kuptohet se ajo i referohej serialit “Chicago P.D.” të NBC-së, ku luajti rolin e detektives Erin Lindsay për 84 episode. Më herët, ajo e kishte përshkruar këtë përvojë si "të lodhshme".
“Isha në një moment të mirë në karrierë pas përfundimit të ‘One Tree Hill’ dhe isha gati për hapin tjetër,” tha Bush. “Po punoja në një komedi që e adhuroja për CBS, dhe më pas pranova një rol në një shfaqje tjetër që ishte në listën time të dëshirave. Por ajo që më priste ishte një tjetër lloj traume, një përvojë e vazhdueshme traumatike në vendin e punës.”
Kur Lewinsky e pyeti nëse bëhej fjalë për sjellje të papërshtatshme në aspektin profesional apo personal, dhe çfarë lloj abuzimi kishte përjetuar, Bush u përgjigj:
“Profesional dhe të gjitha llojet e abuzimit. Duke parë prapa, e kuptoj që pata mundësinë të largohesha dy vjet më herët. Por bëra atë që kisha mësuar të bëja: thashë me vete se nuk do të lejoja që sjellja e dikujt tjetër të më cënonte integritetin. Do të qëndroja, do të punoja, do ta bëja më të mirën. Por nuk ia dola.”
Aktorja e përshkroi eksperiencën në këtë serial si "ferr".
“Sëmuresha shpesh, më binin flokët, kisha pagjumësi dhe luhatje ekstreme në peshë. Ankthi më paralizonte. Si një ekstroverte që i do njerëzit, nuk mund ta besoja se ndihesha aq e izoluar sa mezi dilja nga shtëpia. Nëse dikush më prekte, villja nga paniku. Nuk flisja me askënd. Nuk doja as të më shikonin. Shkoja çdo ditë në punë si të isha duke u përgatitur për luftë. Duhej të mësoja të kontrolloja emocionet që të mos lëndohesha.”
Bush u largua nga seriali në prill të vitit 2017, vetëm pak muaj para se të shpërthente lëvizja #MeToo. Ajo zbuloi se në tetor të atij viti kishte marrë një telefonatë nga një drejtues i serialit që kërkonte falje.
View this post on Instagram
Aktorja tha se kishte rrëfyer përvojën e saj te disa persona të tjerë dhe kishte parë “tmerrin në fytyrat e tyre”, gjë që e ndihmoi ta kuptonte se nuk ishte ajo problemi.
“Oh, kuptova se nuk jam unë e çmendur,” tha ajo. “Thjesht isha në një ambient ku askush nuk donte të dëgjonte, sepse e vërteta do të ishte kërcënim për makinerinë që kishin ndërtuar.”
Në një intervistë të mëparshme në podkastin “Armchair Expert”, Bush tha se gjatë xhirimeve për “Chicago P.D.” ndjehej e përjashtuar dhe e shpërfillur:
“Ndihesha sikur isha lakuriq, e mavijosur dhe me gjakderdhje në mes të Times Square, duke bërtitur për ndihmë, dhe askush nuk ndalej.”
NBC nuk ka dhënë ende asnjë koment mbi këto deklarata.
Ndërkohë, Sophia Bush është rikthyer në ekran këtë sezon me një rol të përsëritur në serialin “Grey’s Anatomy” të ABC-së.
