Edhe kur je vazhdimisht në kontakt me trendet më të fundit të modës, ndonjëherë ndodh që një model i harruar të rikthehet papritur. Një ditë të duket sikur është zhdukur prej vitesh, dhe ditën tjetër, e sheh kudo. Pikërisht kjo ndodhi këtë javë. Duke shfletuar pamjet e fundit të personazheve të famshëm, pamë se shumë prej tyre kishin lënë mënjanë këpucët me majë të mprehtë, dikur simboli i elegancës, duke i zëvendësuar me një model që nuk e kishim parë prej kohësh: këpucët peep-toe.
Po flasim për ato këpucë me gishtin e madh të hapur, një detaj i vogël, por mjaftueshëm i fuqishëm për të sjellë një ndjesi ndryshe në veshje. Dikur konsideroheshin të dala mode, madje edhe pak të “shëmtuara”, por tani po përjetojnë një rikthim të merituar.
E para që tërhoqi vëmendjen ishte Margot Robbie. Me një stil të thjesht, xhinse dhe një xhaketë asimetrike, ajo kishte veshur peep-toe.
Më pas ishte Paloma Elsesser, e cila gjatë Javës së Modës në New York, zgjodhi një palë peep-toe të zeza të kombinuara me një fund të gjatë dhe një bluzë transparente.
Ndërkohë, Tracee Ellis Ross tregoi edhe një herë se di të luajë me stilin si askush tjetër. Ajo kombinoi peep-toe me pantallona të gjata xhins dhe një bluzë me print grafik.
