Nëse jemi futur qoftë edhe pak në botën e grimit, me siguri na ka zënë syri videot në TikTok që flasin për metodën 53, një teknikë e zgjuar, e thjeshtë dhe shumë efektive për konturimin e fytyrës. Premton një pamje të freskët dhe të ndriçuar, pa ekzagjerime dhe me pak përpjekje. Dhe më e mira? Është perfekte për grimin e përditshëm.
Çfarë është “Metoda 53” dhe pse është bërë virale?
Kjo teknikë përbëhet nga dy hapa shumë të thjeshtë, por efektivë:
Forma e numrit 5 me korrektor, për të ndriçuar zonat kyçe të fytyrës.
Forma e numrit 3 me kontur kremoz ose bronzer, për të krijuar hije dhe dimension.
Pasi i aplikojmë të dy produktet, i përziejmë mirë dhe rezultati është një fytyrë natyrale, e konturuar dhe e “tërhequr”, pa pasur nevojë për teknika të ndërlikuara apo shumë produkte.
Si ta realizosh metodën 53, hap pas hapi
1. Vizato “5”-ën me korrektorin:
Përdor një korrektor 1-2 nuanca më të çelët se lëkura jote dhe aplikoje në këto zona, duke krijuar një formë që ngjan me numrin 5:
Nën sy
Poshtë përgjatë hundës
Rreth gojës
Nën mjekër
2. Vizato “3”-in me kontur/bronzer:
Me një produkt kremoz në nuancë më të errët se toni yt i lëkurës, vizato një 3 klasik:
Në skajet e ballit
Poshtë mollëzave
Gjatë vijës së nofullës
3. Përziej produktet me kujdes:
Fillo me konturin, përzieje me furçë duke e tërhequr lart (jo poshtë!) për të krijuar efekt ‘lifting’.
Më pas, përzieje korrektorin me një furçë tjetër apo sfungjer me lëvizje të buta, për të ruajtur ndriçimin në zonat e duhura.
Këshilla për një rezultat të përsosur:
Gjithmonë përziej lart: Kjo krijon efektin e ngritjes natyrale së fytyrës.
Përdor furça të ndara për secilin produkt: Kështu ruan intensitetin e konturit dhe shkëlqimin e korrektorit, pa i përzier pa dashje.
Në TikTok, kjo teknikë po bën namin, me miliona shikime dhe rikrijime nga përdorues e influencuese që betohen për efektin e mrekullueshëm të këtij truku.
