Nuk ka rëndësi sa e pastër mendon se është shtëpia jote, bakteret janë aty. Në vendet më "të pafajshme", në objektet më të padëmshme, në zonat që askush nuk i merr seriozisht. Nëse po mendon për WC-në, je shumë larg. Shtëpia jote ka të paktën tetë “zona të zeza” që fshehin baktere, myk, e madje edhe fekale mikroskopike (ew e dimë, po ja që është e vërtetë). Ja ku janë, një për një:
1. Kuzhina është një ndër zonat më të rrezikshme.
Aty ku mendojmë se pastrojmë më shumë, në fakt po bëjmë qarkullim bakteresh. Sfungjerët e enëve janë më të pistë se kapaku i tualetit. Lavamanët, sipërfaqet ku përgatisim ushqimin, dërrasat e prerjes, madje edhe makineria e kafesë, të gjitha janë shpesh të mbushura me mikrobe që nuk i sheh, por i ndjen në ndonjë dhimbje stomaku.
Dhe nuk është vetëm higjiena, por mënyra si i ruajmë sendet dhe sa shpesh i pastrojmë. Nëse po përgatit një sallatë dhe në të njëjtën kohë po mban në dorë telefonin, ke bërë më shumë dëme sesa mendon.
2. Butonat, dorezat dhe çelësat e dritës janë të padukshme në listën e përditshme të pastrimeve, por janë të parat që duhen marrë seriozisht.
Kush i lan? Askush. Kush i prek? Të gjithë. Në fakt, doreza e frigoriferit dhe çelësi i dritës në banjë janë më të ndotur se shumë objekte të tjera që konsiderohen më “të rrezikshme”. Duke qenë që i prek me duar të papastra, shpesh pas kthimit nga jashtë apo gjatë gatimit, bakteret grumbullohen në sipërfaqe plastike dhe jetojnë aty me ditë të tëra. Thjesht fillo t’i përfshish në pastrimin e përjavshëm. Do të ndryshojë më shumë gjëra sesa mendon.
3. Çanta e makeup-it është një tjetër “zonë e kuqe”.
Nëse e ke futur ndonjëherë në çantën e palestrës, e ke mbajtur në banjë ose e ke harruar në makinë në vapë, sapo i ke bërë mikpritje baktereve. Furçat, sfungjerët, lapsat, pudrat, të gjitha janë objekte që prekin fytyrën tënde çdo ditë dhe shpesh janë të pambrojtura.
E vetmja mënyrë për të mos i kthyer në burim infeksionesh është që t’i lash rregullisht, t’i mbash në vende të thata dhe të mos i ndash me askënd. Ah, dhe na beso: nëse sytë të janë skuqur ndonjëherë pas makeup-it, nuk është thjesht ndjeshmëri. Ka shumë mundësi të jetë diçka që ka jetuar për javë të tëra në furçën tënde.
Banja është klasikja që të gjithë presin në këtë listë, por ndryshe nga sa mendohet, nuk është kapaku i WC-së problemi më i madh.
4. Vendi rreth lavamanit, tubat e dushit, rrjedhjet, cepat e lagësht, aty ndodh gjithçka.
Plus, banja është gjithmonë e ngrohtë dhe e lagësht, që e bën terrenin ideal për çdo mikrob të vogël që do të shumojë veten. Peshqirët janë gjithashtu shumë të rëndësishëm, duhen ndërruar rregullisht dhe duhen tharë mirë.
5. Rrobat dhe lavatriçja janë një tjetër kapitull që shumë e harrojnë.
Të lësh rrobat e lara brenda në lavatriçe për më shumë se 30 minuta është si t’i ftoje mikrobet të bëjnë “after party”. Akoma më keq nëse e ndan lavatriçen me të tjerë. Në ato raste, edhe vetë kazani mund të jetë një burim infeksioni.
Rrobat që i ke veshur jashtë? Duhet të lahen me ujë të nxehtë sa herë që të jetë e mundur. Dhe rrobat e palestrës mos i lëe kurrë në çantë gjatë gjithë ditës, është thjesht një ftesë për erë të keqe dhe mikrobe.
6. Dhoma e ndenjjes dhe zyra e shtëpisë duken si vendet më të sigurta, por janë fiks e kundërta.
Në tastierë, telekomandë, celular, madje edhe në mbulesat e divanit, aty ndodhen sasi të frikshme myku dhe baktereje. Sidomos në shtëpitë ku pajisjet ndahen me të tjerë. Mendoje pak: sa herë ke ngrënë mbi tastierë apo ke prekur telekomandën me duar të yndyrshme nga patatinat? Ja pra. Dhe e ke vënë re ndonjëherë që kollitesh më shpesh kur punon nga divani? Mund të mos jetë thjesht alergji...
7. Kafshët shtëpiake, pavarësisht gjithë dashurisë që japin, janë gjithashtu burim mikrobesh.
Pjatat e tyre, lodrat dhe lodra e preferuar e qenushit, të gjitha mbajnë baktere që qarkullojnë nëpër shtëpi. Edhe nëse nuk sëmuren vetë, mund t’i kalojnë tek ti.
Është shumë e thjeshtë: laji gjërat e tyre rregullisht me ujë të nxehtë, mos i lër pjatat me ushqim të mbetur gjithë ditën dhe, kur futen nga jashtë, pastroju pak këmbët.
8. Dhe e fundit, por jo më pak e rëndësishme: sendet personale.
Portofoli, çelësat, celulari, kufjet, fundi i çantës së shpinës, të gjitha janë të ekspozuara ndaj sipërfaqeve publike dhe sjellin bakteret drejt e në shtëpi. Në një studim të thjeshtë, u gjet fekale në më shumë se gjysmën e celularëve të analizuar. Të gjitha këto objekte janë vazhdimisht në kontakt me duart e tua, me fytyrën, me tavolinat, me krevatin dhe, ndjesë që e themi kaq drejtpërdrejt, me jastëkun ku fle.
Pra po, shtëpia jote është më e pistë sesa do të doje ta pranoje. Por lajmi i mirë është që zgjidhjet janë shumë më të thjeshta sesa duket. Një pastrim më i menduar, më shumë kujdes ndaj objekteve të vogla, pak më shumë vetëdije për rutinën tënde dhe gjithçka ndryshon.
Burimi: Healthline
