Getty Image

Një festival sllovak që pritej të mirëpriste Kanye West javën e ardhshme është anuluar pas trazirave të shkaktuara nga publikimi i një kënge nga reperi amerikan që lavdëron udhëheqësin nazist, Adolf Hitler.

Përpara anulimit të koncertit të 20 korrikut, festivali i hip-hopit Rubicon në Bratislavë ishte planifikuar të ishte performanca e vetme e konfirmuar live e Kanye në Europë këtë vit.

Edhe pse ka fituar 24 çmime Grammy gjatë karrierës së tij, reperi është bërë i njohur për tekstet e tij gjithnjë e më antisemite dhe plot urrejtje.

Kanye West, i cili e ka ndryshuar ligjërisht emrin e tij në Ye, publikoi këngën Heil Hitler më 8 maj, në 80-vjetorin e humbjes së Gjermanisë naziste në Luftën e Dytë Botërore. Kënga përfundon me një pjesë të një fjalimi që Adolf Hitleri mbajti në vitin 1935 në tekstin origjinal gjerman, i cili përfundon me udhëheqësin nazist që u bën thirrje mbështetësve të tij të "më mbrojnë mua ashtu siç ju mbrojta unë juve".

Kënga u ndalua në Gjermani për shkak të simbolizmit të saj ekstremist sipas ligjeve kundër gjuhës së urrejtjes dhe u hoq nga shumica e platformave kryesore të transmetimit, por u bë virale dhe gjeti mbështetje në platformën X të Elon Musk.

Pas njoftimit për paraqitjen e West në Rubicon, mijëra njerëz nënshkruan një peticion kundër koncertit, duke e quajtur atë "një fyerje ndaj kujtesës historike, një glorifikim të dhunës së luftës dhe një poshtërim të të gjitha viktimave të regjimit nazist".

Gjatë Luftës së Dytë Botërore, më shumë se 70,000 hebrenj sllovakë u çuan në kampe përqendrimi, iu dorëzuan autoriteteve gjermane dhe u vranë.

Në një njoftim në Instagram të mërkurën vonë në mbrëmje, më 9 korrik, organizatorët e festivalit thanë se vendimi për të anuluar eventin ishte “për shkak të presionit mediatik dhe tërheqjes së disa artistëve dhe bashkëpunëtorëve”.

Festivali Rubicon, i cili konsiderohet si një ndër eventet kryesore të hip-hopit në Europën Qendrore, ishte planifikuar të zhvillohej nga 18 deri në 20 korrik. Reperët amerikanë Offset dhe Sheck Ëes do të ndanin skenën me West.

Gjithashtu u zbulua këtë muaj se Australia ia revokoi vizën Kanye-t për shkak të këngës, në të cilën reperi flet për betejën e tij për kujdestarinë e fëmijës me ish-gruan e tij, Kim Kardashian. Gruaja e tij aktuale, Bianca Sensori, është australiane.