
"E dashur vajzë apo grua,
Nëse je duke lexuar këtë mesazh dhe ndihesh nën presion për t'u bërë nënë "në kohë", dua të të them diçka nga zemra: nuk ka një “kohë të duhur” që e përcakton shoqëria për të qenë nënë. Ka vetëm kohën kur ti ndihesh gati.
Unë sot jam 50 vjeç dhe kam sjellë në jetë vajzën time të parë në moshën 37-vjeçare dhe të dytën në moshën 42. Dhe jo, asnjëherë nuk jam penduar. Përkundrazi, kam jetën më të plotë që mund të kisha ëndërruar ndonjëherë.
Nuk u nxitova të bëhem nënë. Në dekadën e katërt të jetës sime, ndihesha e formuar si grua, e qetë në karrierën time dhe mbi të gjitha e dashuruar me jetën time. Më në fund isha gati ta ndaja këtë dashuri dhe këtë qëndrueshmëri me dikë tjetër. Jo sepse më duhej, por sepse doja.
Kur bëhesh nënë "vonë", nuk e sheh fëmijën si një detyrë apo sakrificë. E sheh si një zgjerim të shpirtit tënd. Si një investim. Mua më kanë mësuar që familja është gjithçka dhe këtë dashuri që kam marrë, jam përpjekur t’ua jap vajzave të mia me çdo përqafim, çdo fundjavë të kaluar bashkë, çdo lojë pasditeve.
Edhe pse ka një diferencë moshe mes meje dhe vajzave të mia, lidhja jonë është ndërtuar mbi kohën cilësore. Jo mbi rregullin se në ç’moshë duhej t’i kisha lindur.
Vajza ime e madhe sot është vetëm 13 vjeç dhe ma bën zemrën mal kur më thotë se sa i pëlqen të kalojë kohë me mua. Kurse e vogla, një ditë, pa ia sjellë fare ndër mend unë, më tha:
“Mami, edhe pse mamat e tjera janë më të reja, ti për mua je mami më e bukur dhe më super nga të gjitha.”
Këtë të fundit, e ka mësuar nga mënyra si më flet babai i saj. Dhe është pikërisht aty ku kupton sa shumë ndikohen fëmijët nga ajo që shohin e ndiejnë çdo ditë në shtëpi.
Nuk ka fjalë më të bukura sesa ato që vijnë natyrshëm nga një zemër e vogël që është rritur duke parë dashuri, respekt dhe butësi. Fëmijët janë pasqyra më e ndershme e asaj që jemi si prindër. Dhe kur fëmija rritet me dashuri, i duken rrjedhimisht prindërit e tij/saj më të bukurit në botë. E di, sepse kështu i shikoj dhe unë prindërit e mi të mrekullueshëm.
Pra, si përfundim, mund të jesh nënë edhe në të 20-at, në të 30-at, por asnjëherë nuk është vonë të bëhesh nënë kur ndihesh ti gati. Mos e mat jetën me orën biologjike të të tjerëve, por me ritmin e zemrës tënde.
Me dashuri,
Një nënë që nuk u nxitua dhe fitoi gjithçka," - shkruar nga një ndjekëse e Anabel, për rubrikën "Mes nesh".
Copyright Anabel.al / Ndalohet ribotimi pa lejen e redaksisë.