Regjisori i shquar hungarez Béla Tarr, i njohur për filmat "Sátántangó", "The Turin Horse" dhe fitues i shumë çmimeve për veprat e tij të gjata dhe shpeshherë me humor të errët, është ndarë nga jeta në moshën 70-vjeçare.
Gjatë një karriere që zgjati disa dekada, Tarr shkroi dhe bëri nëntë filma të gjatë, duke nisur me debutimin e tij "Family Nest" në vitin 1979 dhe duke përfunduar në 2011 me "The Turin Horse", i cili fitoi Çmimin e Madh të Jurisë “Silver Bear” në Festivalin Ndërkombëtar të Filmit në Berlin atë vit.
Tarr shpesh bashkëpunoi me shkrimtarin hungarez László Krasznahorkai, fitues i Çmimit Nobel për Letërsinë vitin e kaluar. Disa nga filmat e tij, të cilët ishin përshtatje të romanëve të Krasznahorkai, fituan çmime në festivale në Europë dhe Azi.
Në një deklaratë, Shoqata e Regjisorëve Hungarezë konfirmoi vdekjen e Tarr, duke shkruar:
“Me dhimbje të thellë njoftojmë se, pas një sëmundjeje të gjatë dhe të rëndë, regjisori Béla Tarr ka ndërruar jetë herët përgjatë mëngjesit.”
Tarr lindi në vitin 1955 në qytetin jugor hungarez Pécs, por kaloi pjesën më të madhe të jetës në kryeqytet, Budapest.
Ai përfundoi filmin e tij të parë të gjatë, "Family Nest", kur ishte vetëm 23 vjeç. Ky film fitoi Çmimin e Madh në Festivalin Ndërkombëtar të Filmit Mannheim-Heidelberg atë vit.
Béla Tarr njihej për një gjuhë kinematografike radikale dhe lehtësisht të dallueshme, të ndërtuar mbi plane shumë të gjata, ritëm të ngadaltë dhe imazhe të forta bardhë e zi. Veprat e tij nuk synonin rrëfimin klasik, por përjetimin e kohës, hapësirës dhe gjendjes shpirtërore, duke u ndalur te vetmia, dëshpërimi dhe absurdi i ekzistencës njerëzore, shpesh në realitete të varfra e të shkatërruara pas komunizmit. Përmes këtij minimalizmi të ashpër, Tarr u bë një nga figurat themelore të kinemasë së ngadaltë dhe një ndikim i madh për autorët e kinemasë artistike në mbarë botën.
