Vetëm disa orë pas performancës së tij në Super Bowl-in e së dielës, më 8 shkurt, ylli portorikan (emri i vërtetë: Benito Antonio Martínez Ocasio), 31 vjeç, hoqi të gjitha postimet nga profili i tij në Instagram, përfshirë edhe foton e profilit. Ai gjithashtu nuk ndjek më asnjë njeri, duke lënë në bio vetëm një link drejt albumit të tij "Debí Tirar Más Fotos".
Bad Bunny nuk u dha asnjë shpjegim ndjekësve të tij (rreth 50 milionë) për këtë ndryshim të madh para se të fshinte pothuajse gjithçka.
Shumë fansa spekuluan në rrjetet sociale se ky veprim mund të jetë një paralajmërim për një projekt apo njoftim të rëndësishëm që pritet së shpejti, ndërsa të tjerë menduan se ai mund të jetë përballur me reagime negative për faktin që performanca e tij ishte plotësisht në spanjisht.
Gjatë performancës kryesore në Apple Music Super Bowl LX, në Kaliforni, këngëtari u shoqërua në skenë nga disa të famshëm, përfshirë Lady Gaga, Ricky Martin, Cardi B dhe Pedro Pascal.
Në performancë u shfaqën flamuj të ndryshëm që përfaqësonin vende nga i gjithë kontinenti amerikan, duke e përqendruar mesazhin te uniteti.
Megjithatë, jo të gjithë u mahnitën nga performanca e tij.
Presidenti Donald Trump e quajti shfaqjen “absolutisht të tmerrshme” në një postim në Truth Social, duke shtuar se “nuk ka asnjë kuptim, është një fyerje për Madhështinë e Amerikës dhe nuk përfaqëson standardet tona të suksesit, krijimtarisë apo ekselencës”.
“Askush nuk kupton asnjë fjalë nga ajo që thotë ky person dhe vallëzimi është i neveritshëm, sidomos për fëmijët e vegjël që po e shikojnë në të gjithë SHBA-në dhe në mbarë botën,” vazhdoi ai. “Kjo ‘shfaqje’ është një ‘shuplakë në fytyrë’ për vendin tonë.”
