Bujar Lako është një prej emrave më të mëdhenj të kinematografisë shqiptare. Me filma si: “Gjeneral Gramafoni”, “Udha e shkronjave”, “Ballë për ballë”, “Kthimi i ushtrisë së vdekur”, si dhe shumë role në teatër, aktori mori dashurinë e publikut dhe vlerësimin e kineastëve shqiptarë.

Lako është nderuar me shumë çmime e tituj të lartë; në 1979-ën iu akordua çmimi i Republikës i shkallës së parë; në 1991-shin u shpall aktori më i mirë për interpretimin në filmin “Kthimi i ushtrisë së vdekur”, si edhe është nderuar me titullin “Artist i Merituar” në vitin 1985.

Përveç këtyre vlerësimeve në vend, Bujar Lako ka arritur të marrë edhe mirënjohjen nga disa prej kritikëve më të rëndësishëm të kinematografisë, siç ishte juria e Festivalit Ndërkombëtar të Filmit në Kairo. Në 2005-ën ai mori çmimin si aktori më i mirë i vitit, çmimi më i lartë për një aktor shqiptar, në një festival të kategorisë A.

Në këtë edicion, filmi shqiptar “Syri Magjik” (“The Magic Eye”) i regjisorit Kujtim Çashku, u vlerësua me disa çmime, mes të cilave edhe çmimi i “Filmit më të Mirë” në festival.