“Përshëndetje!

Më ndihmoni që të marr një mendim nga nënat e kësaj faqeje. Jam nënë e dy fëmijëve dhe jam 2-3 javë shtatzënë. Gjendem në një problem shumë të madh: vetëm burri punon, ndërsa unë jo. Im shoq nuk e pranon këtë shtatzëni, jo sepse nuk do, por thotë që nuk i përballojmë dot tre. Nuk do që të vuajnë fëmijët, thotë që më mirë t’i plotësojmë kushtet këtyre të dyve. Më dhemb në shpirt, nuk di ç’të bëj”, ishte letra e ardhur në Facebook-un e Revistës Anabel.

Komentet e ndjekësve ishin pafund, por pjesa më e madhe e tyre ishin totalisht kundër abortit për arsye si në vijim: “Nëse mund të rrisësh dy, mund të rrisësh dhe një të tretë”, “Aborti është krim”, “Fëmija vjen me kismetin e vet”, “Është njësoj si të vrasësh njërin prej fëmijëve që ke në shtëpi” etj.

Komentet si ky në vijim ishin si uji i pakët. Përfundimisht, shqiptarët nuk e konsiderojnë abortin zgjidhje.