Pas ndërprerjes së rrugëtimit të tyre dy dekada më parë, me pjesëmarrjen në festivalin e vitit 1999 në “Kënga Magjike me “Do të them diçka”, “Ritfolk” – një prej grupet më të njohura dhe më revolucionare të pasviteve ’90 – u rikthye sërish dje mbrëma përmes një koncerti të mbajtur te Qendra Kulturore e Katedrales Ortodokse në Tiranës.

Ndonëse vokalistët Altin Goci dhe Saimir Bravo nuk ishin në kërkim të fondeve, qe ABI Bank që kontaktoi me këngëtarët për një rikthim të grupit të famshëm. Pjesëtarët e tjerë të grupit mungonin, megjjithëse nuk munguan përshëndetjet për rolin e tyre në “Ritfolk”.

Herë pas herë, koncerti mori nota familjare. Saimir Braho i dedikoi dy këngë familjes së tij, gruas dhe fëmijëve dhe një këngë Zotit si besimtar i devotshëm prej vitesh. Po kështu Altin Goci u shpreh se kënga e tij “Me ty kaq pranë” ishte një dedikim për bashkëshorten, Irenën.

Siç theksoi edhe poeti dhe publicisti i njohur Ervin Hatibi përmes një video-mesazhi gjatë koncertit, djemtë e “Ritfolk” ishin të rrallë për mënyrën si u përpoqën të bënin muzikë duke qëndruar me orë të tëra në Institutin e Kulturës Popullore për të studiuar dhe përthithur folklorin shqiptar.

Koncerti – biletat e të cilit u shitën në kohë rekord – u hap me hitin “Dëshirë dhe heshtje” që i dha famë në Festivalin e 33-të të Këngës në RTSH, në dhjetor të 1994-s. Mbrëmja nostalgjike u mbyll me “Ëndërroj”.

Koncerti i tyre shkaktoi të publiku një nostalgji për vitet ’90 dhe për këdo që këndoi:

“Sa dua të jem larg
larg mërzitjes pa kufi
Sonte do këndoj për ju
Ju që njihni veç qetësi
Kënga ime ngjitet larg
Atje larg në qiellin blu
Ju o yje më besoni
Kënga ime është për ju...”