Shembja e Teatrit Kombëtar u shoqërua me shumë zemërim nga protestuesit që ishin kundër prishjes së tij, me reagime qytetarësh, politikanësh, artistësh, por dhe me reflektime që në një moment si ky shërbejnë për të na kthjelluar edhe më mirë.
Programin e sotëm të "E diela Shqiptare", Ardit Gjebrea e nisi pikërisht me një reflektim nisur nga ç'ndodhi orët e para të mëngjesit. Sipas tij, shembja e vërtetë e Teatrit ka ndodhur para shumë kohësh, që kur artistët dhe kultura janë lënë pas dore për breza me radhë dhe askush s'ka ngritur zërin për ta ndryshuar këtë.
"Sot dita nisi papritmas me një ngjarje kulturore, që do thoja është edhe politike. Godina e Teatrit Kombëtar u shemb, por shembja e vërtetë është mungesa e kujdesit prej shumë vitesh për komunitetin që ka mbajtur gjallë breza të tërë. Për atë komunitet që ka fituar duartrokitjen, nderim, respekt, por që pas viteve të demokracisë nuk pati kujdesin e një strategjie që të ecte paralel me zhvillimin e biznesit, të ekonomisë dhe të lulëzonte siç artistët vërtetë meritojnë."
Për të, shembjen e Teatrit e solli harresa dhe neglizhenca e shumë viteve kundrejt artistëve dhe punës së tyre.
"Harresa ose lënia pas dore sot solli mëngjesin e sotëm… Është shumë vonë, nuk e mbrojtët dot godinën sepse nuk keni mbrojtur artistët që e kanë mbajtur këtë godinë prej kohësh. Dikur zgërdhinit dhëmbët kur kryeministri i sotëm bënte batuta për Violeta Manushin, që ishte njësoj sikur të shpotitje një brez që i ka dhënë vlerë mureve që u shembën sot. Kush ka më shumë rëndësi? Muret apo njerëzit? Kush i jep vlerë institucionit?
E nëse nuk je kujdesur për ta, e nëse nuk ulërin dhe të vritesh për artistët, është shumë pak sot të mbrosh pasojën e veprën që mban emrin artist teatri. Duhet që politikanët të ndërtojnë një politikë të caktuar për teatrin, të gjithë bashkë, që do të thotë për artistët e teatrit. Duhet që ne të mbushim sallat që ata të marrin frutin e djersës së tyre."-përfundon Gjebrea.
Shembja e Teatrit Kombëtar nisi rreth orës 04:30 të mëngjesit, aksion i cili u shoqërua me tension, përleshje mes policisë dhe protestuesëve që u përpoqën të bënin rezistencë gjer në fund.
