Sezoni i ri televiziv duket se do ta gjejë Alketa Vejsiun sërish në ekran, këtë herë me një progam të ri të quajtur “Love Story”, i cili që nga emri të dikton llojin e formatit.

‘’Love Story, programi i ri që nisim në Tv Klan është një ‘reality dating show’, një produksion italo-shqiptar për dashurinë e vërtetë dhe emocionet.” – shkruan ajo.

Ndër të tjera, Vejsiu sqaron se “Love Story është një format unik që ngjan vetëm me veten e tij dhe përmes këtij formati “synojnë të bëhen një shembull dhe model frymëzues dhe emancipues për rininë shqiptare, për mënyrën se si me elegancë dhe respekt veçanërisht një djalë duhet të manifestojë ndjenjat ndaj një vajze”.

Vlen të theksohet se nuk është hera e parë që sillen në ekran, ose platforma të tjera, programe me në qendër njerëz që tentojnë të njihen me njëri-tjetrin për të pasur pse jo një histori dashurie. Kujtojmë këtu “Cupid” e dikurshëm, të moderuar nga Albana Osmani, një program që ndikuar nga fryma e televizionit italian dhe “Uomini e Donne” të një prej emrave më me peshë të medias italiane, Maria De Filippi, solli një formë të programeve me njohje. Për ata që e kanë harruar, Albana dilte rrugëve të Tiranës për të “bashkuar zemra”. Adi Krasta solli gjithashtu “Kodi Binjak”, një tjetër program me çifte, i cili nuk vazhdoi gjatë. Ndoshta nuk është i njëjti format, megjithatë edhe “Big Brother Albania 9” tentoi të bënte pjesë të programit çifte konkurrentësh, të cilët në mos të dashuroheshin, duhet të njiheshin me njëri-tjetrin.

Dating si format e përqafoi edhe “Hostel by Anabel” në sezonin e tij të parë në rubrikën “Anabel Lab”, ku të rinj të panjohur, i bënin pyetje njëri-tjetrit për t’u njohur më shumë dhe për të realizuar një takim tjetër, pa kamera. Pa dashur të shkëputemi nga tema e televizionit, por mund të shtojmë këtu se dating si format ka qenë pjesë edhe e rubrikave të dikurshme (Dua të më duash) të Revista Anabel në Facebook.

Me fjalë të tjera, emisione/rubrika të tilla me takime dhe/ose njohje nuk ndodhin për herë të parë, por kohëve të fundit vihet re që po kthehen në trend, të paktën në televizion. Më sipër përmendëm “Love Story”, ndërkohë që pak javë më parë, përfundoi sezonin e parë “Për’Puthen”, një format me takime ku vajzat zgjidhnin djemtë, rubrikë në “E Diell” e frymëzuar nga “Uomini e Donne”.

Përpos “Për’Puthen”, pak para se televizionet të mos anulonin programet për shkak të pandemisë, Luana Vjollca prezantoi “Take Me Out”, i cili në versionet e huaja ka një burrë përballë 30 grave dhe është një nga programet më të suksesshëm të “dating”. Luana pritet të rikthehet sërish në ekran.

Madje-madje, edhe “Aldo Morning Show”, një emision mëngjesi, ka një qasje të një formati dating, ku njerëz të panjohur telefonojnë për t’u njohur me njëri-tjetrin.

Programet dating kanë rezultuar përgjithësisht të suksesshme në shifra audience, ndaj jo më kot gjen pafund të tilla në televizione, Netflix e platforma të tjera, ku kujtojmë këtu “The Bachelor”, “The Bachelorette”, “Love Island”, “Love Connection”, “Dating Around”, “Joe Millionaire”, “Blind Date”, “Celebs Go Dating”, “Love is Blind”, “The Circle” etj. Emisione të tilla kanë treguar se në rastin më të mirë, janë interesante dhe me shikueshmëri të lartë, ndërsa në rastin më të keq, thjesht argëtojnë njerëzit.