Princ Harry-t thuhet se iu mohua leja për të marrë pjesë, qoftë edhe në mënyrë simbolike në një ceremoni të Ditës së Përkujtimit (Remembrance Day) në Mbretërinë e Bashkuar.

36-vjeçari kërkoi personalisht nga Pallati Buckingham që të vendoste një kurorë në Cenotaph në emër të tij gjatë shërbimeve të Ditës së Përkujtimit, por propozimi thuhet se u refuzua shpejt.

Anëtarët e oborrit mbretëror e mohuan kërkesën me arsyetimin se ai nuk është më përfaqësues i monarkisë, raporton Sunday Times. Mbretëresha nuk u vu në dijeni për dëshirat e nipit të saj.

Kjo me siguri ka ardhur si një goditje e hidhur për Dukën e Sussex, i cili shërbeu në ushtri për 10 vjet, duke arritur gradën e kapitenit, përfundoi dy turne në Afganistan dhe krijoi Lojërat Invictus, një ngjarje ndërkombëtare sportive për personelin e plagosur të shërbimeve të armatosura .

Sipas biografisë së Sussex "Gjetja e Lirisë", Harry ndihej i shkatërruar që u privua nga titujt e tij ushtarak në fillim të këtij viti. Ai u shkëput nga familja mbretërore dhe u transferua në Kaliforni me gruan Meghan Markle dhe djalin e tyre, Archie.

Kjo është një tjetër shenjë e përçarjes në rritje midis tij dhe familjes mbretërore.

Vëllai i Harry-t, Princi William dhe babai i tyre, Princi Charles, të dy morën pjesë në shërbim dhe vunë kurora me lule.

Në vend të kësaj, Harry dhe Markle vendosën lule dhe një kurorë në Varrezat Kombëtare të Los Angeles, ditën e dielë, 8 nëntor.

“Dita e Përkujtimit për mua është një moment për respekt dhe për shpresë. Unë festoj trimërinë dhe vendosmërinë e veteranëve tanë.”

“Shërbimi është ajo që ndodh në qetësi dhe në kaos. Është ajo që ndodh në errësirë, është ajo që ndodh kur njerëzit nuk shikojnë. Është ajo që ndodh brenda dhe jashtë fushës së betejës. Ka të bëjë me kryerjen e detyrës sonë si ushtarë, ”vazhdoi Harry.

"Për mua si baba, burrë dhe si qenie njerëzore, ka të bëjë me mënyrën se si ne i mbështesim këto vlera në çdo aspekt të jetës sonë."

Burimi: Page Six