Gati një vit pasi mjekët identifikuan rastet e para të një sëmundjeje të re shqetësuese në qytetin Wuhan, Kina duket se po zhvillon një fushatë për të vënë në dyshim origjinën e pandemisë së Covid-19.

Mediat shtetërore kanë raportuar intensivisht për koronavirusin e zbuluar në paketimin e ushqimit të ngrirë të importuar. Gazeta People’s Daily pretendoi në një postim në Facebook javën e kaluar se "të gjitha provat në dispozicion sugjerojnë se koronavirusi nuk filloi në Wuhan".

Një zëdhënës i Ministrisë së Jashtme, i pyetur për raportet e mediave shtetërore se virusi ka origjinën jashtë Kinës, tha vetëm se ishte e rëndësishme të bëhej dallimi midis vendit ku u zbulua për herë të parë Covid-19 dhe vendit të origjinës. "Megjithëse Kina ishte e para që raportoi rastet, nuk do të thotë domosdoshmërisht se virusi ka origjinën në Kinë," tha Zhao Lijian në një konferencë. "Gjurmimi i origjinës është një proces i vazhdueshëm që mund të përfshijë shumë vende dhe rajone."

Shkencëtarët kinezë madje kanë paraqitur një letër për botim në Lancet - ndonëse nuk është rishikuar nga kolegët - që pretendon se "Wuhan nuk është vendi ku ka ndodhur për herë të parë transmetimi Sars-CoV-2 nga njeriu në njeri", duke sugjeruar që infeksioni i parë mund të ketë qenë “nënkontinenti indian”.

Shën.red. Nënkontinenti indian është një zonë e gjerë me madhësinë e Europës që përfshin vende si India, Pakistani dhe Bangladeshi. Brenda nënkontinentit, ka një larmi të gjerë popujsh, gjuhësh dhe fesh. Kjo zonë njihet si Azia Jugore.

Pretendimet se virusi e ka origjinën jashtë Kinës u jepet pak besim nga shkencëtarët perëndimorë. Michael Ryan, drejtori i programit të urgjencave shëndetësore në Organizatën Botërore të Shëndetësisë (OBSH), tha javën e kaluar se do të ishte "shumë spekulative" të argumentonte se sëmundja nuk u shfaq në Kinë.

Raportet e Covid që qarkullojnë në Itali në vjeshtë 2019 duken të dobëta, tha Prof Jonathan Stoye, një virolog në Francis Crick Intitute në Londër. "Të dhënat serologjike [nga Italia] ka shumë të ngjarë të shpjegohen nga antitrupa ndër-reaktivë të drejtuar kundër koronavirusëve të tjerë." Me fjalë të tjera, antitrupat e gjetur në rastet në Itali janë shkaktuar në individë që janë infektuar nga koronavirusë të ndryshëm, jo ata përgjegjës për Covid-19. "Ajo që duket e sigurt është se rastet e para të regjistruara të sëmundjes ishin në Kinë," shtoi Stoye. "Kështu që ka shumë të ngjarë që virusi të ketë origjinën në Kinë."

Për gjurmët e koronavirusit që janë gjetur në paketimin e ushqimit të ngrirë, shkencëtarët mendojnë se paraqesin një rrezik shumë të ulët për një sëmundje që tani besohet të transmetohet përmes spërklave të frymëmarrjes.

Burimet: Guardian, People’s Daily