FDA-Administrata e Ushqimit dhe Barnave pas analizave të hollësishme, arriti në përfundimin që vaksina e parë kundër Covid-19 të konsiderohet për shpërndarje në SHBA.

Sipas tyre, vaksina e Pfizer "i plotëson kriteret e parashikuara të suksesit" duke shtuar se agjensia shumë shpejt do të japë dritën jeshile për përdorim në masë të vaksinës. 

Sot (e martë, 8 dhjetor) agjensia publikoi 2 analiza të ndara nga njëra-tjetra; një nga shkencëtarët e stafit të saj dhe një nga prodhuesit e vetë vaksinës Pfizer në bashkëpunim me partnerët gjermanë, BioNTech.

Pas analizave të hollësishme, FDA-ja nënvizoi "përfitimet e njohura" nga vaksina, ku kryesorja përfshin zvogëlimin e rrezikut me Covid-19 për të paktën 7 ditë pas dozës së dytë. Deri më tani, thuhet se vaksina e Pfizer kërkon dy doza për mbrojtje të plotë.

 Avantazhi tjetër e kësaj vaksine miratuar nga FDA është reduktimi i riskut të konfirmuar të Covid-19 pas dozës së parë dhe para dozës së dytë si dhe "zvogëlimi i rrezikut të konfirmuar të rëndë të Covid-19 në çdo kohë pas marrjes së dozës së parë. 

Përfundime të tjera të analizës së agjensisë, tregojnë se "nuk u identifikuan shqetësime kërcënuese apo efekte anësore që do të pengonin lëshimin e një autorizimi emergjent". Efektet anësore serioze, janë të rralla ndërsa ato më të zakonshmet përfshinin dhimbje koke ose ndjesi të përzierash.

Të tilla përfundime konsiderohen një sukses dhe moment historik, pasi kritikët i druheshin faktit që vaksina do të mund të parandalonte vetëm të formën e lehtë dhe të moderuar të kësaj sëmundjeje.

Ndërkaq, një grua 90-vjeçare është bërë pacientja e parë në botë që ka bërë vaksinën e Pfizer për Covid-19 pas miratimit të saj në Mbretërinë e Bashkuar. Shërbimi Shëndetësor Kombëtar (NHS) nisi fushatën më të madhe të vaksinave këtë të martë (8 dhjetor).

Burimi: The Wall Street Journal & NPR