Në një video ilustruese të publikuar në rrjetet sociale, ministrja e Shëndetësisë dhe Mbrojtjes Sociale, Ogerta Manastirliu, publikoi procedurën e rimbursimit të barnave për pacientët e diagnostikuar me Covid-19.

Dr. Bujar Mema, nga Qendra Shëndetësore nr.9 në Tiranë, shpjegoi se procedura e rimbursimit të barnave bëhet përmes kontaktit të drejtpërdrejtë me mjekun e familjes.

“Receta gjenerohet online dhe me kodin përkatës, familjarët e pacientit i marrin barnat në farmaci, me rimbursim 100% nga shteti,” u shpreh Manastirliu.

Pasi një person rezulton pozitiv, Dr. Mema shpjegoi se veprohet kështu:

1. Gjendet pacienti në regjistrin e banorëve dhe cilësohet si “person me Covid”.

2. Përcaktohet stadi i sëmundjes dhe skema e mjekimit.

3. Jepet mjekimi përkatës (vitamina, qetësues për temperaturën, antibiotikë etj).

4. Vendoset kodi i recetës i cili do të përdoret më vonë për rimbursimin e barnave 100%.