Viruset shpesh ndryshojnë dhe këto ndryshime quhen mutacione. Organizata Botërore e Shëndetësisë (OBSH) përcakton një variant si virus që ka "një ose disa mutacione të reja". Ndryshimet në koronavirus nuk janë të pazakonta. Viruset kanë më shumë mundësi të shndërrohen pasi infektojnë më shumë njerëz, por ekspertët kanë thënë që SARS-CoV-2 ka qenë më ngadalë për të ndryshuar. Deri në këto momente, 4 janë variantet e zbuluar nga ekspertët.

Varianti i Mbretërisë së Bashkuar

Britania ishte një nga vendet e para që identifikoi një variant të Covid që transmetohet më shpejtë. Një nga ndryshimet që e bëri këtë variant të dallueshëm ishte një mutacion i njohur si N501Y, i cili prek domenin lidhës të receptorëve (RBD) të proteinës “spike” - pika ku virusi lidhet me një qelizë.

"Ky mutacion, të paktën në një mjedis laboratorik, lejon që proteina të lidhet më fort me proteina në sipërfaqet e qelizave që janë shënjestra", tha Dr. Eleanor Gaunt nga Universiteti i Edinburgh-ut.

Varianti tani është zbuluar në 70 vende, sipas OBSH.

Varianti i Afrikës së Jugut

Autoritetet thanë më 18 dhjetor se një variant i koronavirusit po përhapet me shpejtësi në tre provinca dhe po shkaktonte shqetësime. Ata e quajtën 501Y.V2 dhe zbuluan se po kontribuonte në rritjen e infeksioneve në Afrikën e Jugut në janar.

Renditja gjenomike tregoi se ky ishte një variant i ndryshëm nga ai i identifikuar në Mbretërinë e Bashkuar, por të dy variantet e Afrikës së Jugut dhe Mbretëria e Bashkuar ndajnë mutacionin N501Y në proteinën “spike”.

Ekziston një farë shqetësimi se vaksinat mund të mos jenë shumë efektive kundër këtij varianti. Një studim i fundit në Afrikën e Jugut zbuloi se mutacione të tjera në këtë variant gjithashtu bënë që antitrupat të kenë probleme për të neutralizuar virusin.

Kompania e bioteknologjisë Moderna njoftoi më 25 janar se megjithëse vaksina e dukej të ishte efektive kundër variantit, po zhvillonte një përforcues shtesë.

Varianti i Brazilit

Një variant i koronavirusit që filloi në Brazil u identifikua për herë të parë në katër udhëtarë në Japoni, njoftoi ministria japoneze e shëndetësisë më 10 janar. Ky variant, i quajtur linja P.1, përmban 17 ndryshime unike të aminoacideve, sipas Qendrës Amerikane për Kontrollin dhe Parandalimin e Sëmundjeve.

Ka dy ndryshime të njëjta në proteinën “spike” si varianti që u shfaq në Afrikën e Jugut, duke ngritur shqetësime në lidhje me reagimin ndaj vaksinave.

Varianti i Kalifornisë

Zbulimi i variantit të virusit në Britani në dhjetor, i nxiti shkencëtarët në Kaliforni të fillonin hulumtimin. Por teksa gjetën vetëm disa shembuj të variantit britanik, hasën shumë më tepër një variant që dukej se ishte shfaqur në Kaliforni.

Por shkencëtarët thanë për New York Times se, ndryshe nga Britania, nuk kishte ende prova që ky variant ishte më vdekjeprurës ose më ngjitës se format e tjera të virusit.

A mund të trajtohen variantet?

Prodhuesit e vaksinave tashmë janë duke punuar në përshtatjen e vaksinave edhe ndaj mutacioneve.

BE po bën thirrje që vendet të përpiqen të identifikojnë variantet e virusit. Presidentja e Komisionit Europian, Ursula von der Leyen, tha se vendet anëtare duhet të rritin testimin e tyre dhe të analizojnë gjenomin. Dr. Catherine Smallwood, e cila kujdeset për programin e urgjencave të OBSH-së, tha se kufizimet duhet të forcohen. Ajo tha se vendet duhej të përqendroheshin në uljen e transmetimit.

Burimet: Euronews, New York Times