Qindra mijëra njerëz raportohen të zhdukur në Shtetet e Bashkuara çdo vit. Por është e rrallë që një rast i vetëm të tërheqë vëmendjen e publikut - dhe të nxisë individët të ndërmarrin veprime - siç ka ndodhur me zhdukjen e Gabrielle “Gabby” Petito.
Në korrik, Gabby, 22 vjeç, u nis nga New York-u në një udhëtim me të fejuarin e saj, Brian Laundrie, 23 vjeç. Teksa po udhëtonin me një furgon të bardhë Ford, çifti postoi foto dhe video udhëtimit në Instagram dhe YouTube. Pastaj, më 1 shtator, Brian u kthye nga udhëtimi i vetëm. Dhjetë ditë më vonë, familja e Gabby-t raportoi se ajo ishte zhdukur.
Ngjarja u shndërrua në më të diskutuarën në SHBA, në pjesën më të madhe për shkak të ndërgjegjësimit të krijuar nga njerëzit në rrjete sociale. Çdo zhvillim i ri është përcjellë me vërshime postimesh shpjeguese dhe video nga njerëzit në TikTok, Instagram dhe Twitter. Shumë teori janë debatuar dhe analizuar. Një çift mund të ketë ndihmuar në gjetjen e trupit që i përshtatet përshkrimit të Gabby-t.
Paris Campbell, një komediane dhe shkrimtare, u njoh me ngjarjen në rrjete sociale në fillim të javës së kaluar, kur interesi për rastin ishte i vogël. Ajo së pari lexoi për Gabby-n te Daily Mail më 13 shtator, por nuk kishte lexuar shumë për historinë e tyre në rrjete sociale.
Si nënë e re, Paris, 28 vjeç, u detyrua të përdorë platformën e saj (rreth 150,000 ndjekës në TikTok asokohe) për të provuar dhe ribashkuar prindërit e Gabby-t me vajzën e tyre. TikTok -u i saj i parë rreth Gabby-t paraqiti një poster ku shkruhej "Missing" të cilin e kishte parë në një artikull në lidhje me zhdukjen e saj. "Screenshot, shpërndajeni këtë," tha Paris në video. "Kjo vajzë mungon.”
Në ditët që pasuan, Paris postoi rreth 40 video duke përfshirë përditësime të lajmeve dhe analiza të burimeve në Instagram të Gabby-t dhe Brian-it. Një komentuese, e cila e identifikoi veten si kushërira e Gabby-t, shkroi se familja Petito vlerësonte vëmendjen që ajo i kishte kushtuar çështjes dhe shpresonte që ajo të vazhdonte.
Kyle dhe Jenn Bethune, të cilët kanë dy vjet që jetojnë në një autobus me tre fëmijët e tyre dhe katër qen, duke udhëtuar jashtë vendit dhe duke bërë video për YouTube dhe Instagram, gjithashtu i kushtonin vëmendje historisë së Gabby-t dhe zhdukjes së saj.
Të shtunën, pak para mesnatës, një mik kontaktoi zonjën Bethune dhe i tha se Gabby dhe Brian mund të kenë qenë në Pyllin Kombëtar Bridger-Teton në të njëjtën kohë me familjen Bethune. Zonja Bethune nisi të rishikonte videot që kishte në telefon dhe panë një furgon të bardhë. Ajo telefonoi FBI-në për t’i paralajmëruar për zbulimin e tyre. "Ne e dimë fuqinë e mediave sociale," thotë zoti Bethune.
Videoja u bë virale dhe Jenn Bethune mori një kërkesë për të folur në telefon me nënën e Gabby-t, Nichole Schmidt. Dy gratë u lidhën për humbjen e përbashkët: Ditën kur çifti gjeti pamjet që tregonin furgonin, do të kishte qenë ditëlindja e 17-të e Ethan Roeder, djalit të Jenn, i cili kishte vdekur në një aksident me makinë në një udhëtim familjar.
Të dielën, pas një kërkimi që përfshiu hetuesit nga Shërbimi i Parkut Kombëtar, autoritetet lokale dhe FBI-në, u gjet një trup njerëzor që ngjasonte me profilin e Gabby-t, pranë vendndodhjes së furgonit në video.
Mark Lewis, shkrimtari dhe regjisori i dokumentarit të Netflix "Don't F**k With Cats", i cili përshkruante dy detektivë amatorë që përdorën Facebook dhe faqe të tjera në vitet 2010 për të zgjidhur një mister, tha se "kjo ide e hulumtimit në interneti dhe vigjilencës në internet ”nuk është e re. "Nga siguria e dhomës suaj, ju mund të bëni gjëra të mahnitshme në drejtim të zbulimit," tha ai. "Dhe shumë, shumë njerëz po e bëjnë.”
Përveç postimeve në mediat sociale, rasti është mbuluar nga shumë media, si CNN, New York Times, Fox News.
Udhëtimi – postimet – zhdukja: Hap pas hapi
Qershor 2021
Gabby dhe Brian nisin një udhëtim me furgonin e tyre dhe planifikuan që të vizitonin parqet shtetërore dhe kombëtare në perëndim të Shtetet e Bashkuara. Ajo mbajti kontakte të rregullta me anëtarët e familjes gjatë udhëtimeve; megjithatë, komunikimi u ndërpre papritmas rreth fundit të gushtit, ka deklaruar policia.
12 gusht 2021
Kamerat në trupin e policit në Utah regjistrojnë Gabby-n dhe Brian. Policia i përshkruan si “të përfshirë në një lloj sherri”. Megjithëse të dy përshkruhen që janë grindur fizikisht, "si mashkulli ashtu edhe femra raportuan se janë të dashuruar dhe të fejuar dhe do të martohen dhe dëshpërimisht nuk dëshironin që të akuzonin askënd për ndonjë krim", sipas raportit të policisë.
Sipas vëzhgimeve, ata u ndanë për një natë, por nuk besohet se ka pasur ndonjë sulm sepse të dy i kishin telefonat me vete, në rast urgjence.
Java e fundit e gushtit
Familja e Gabby-t i tha policisë se ata patën për herë të fundit kontakt me të gjatë javës së fundit të gushtit. Para komunikimit të fundit, Gabby besohet të ketë qenë në Parkun Kombëtar Grand-Teton në Wyoming, thotë policia.
Në një konferencë shtypi në shtator, avokati i familjes Petito, Richard Stafford, thotë se komunikimi i fundit i familjes me Gabby-n ishte më 30 gusht, por ata nuk besojnë se mesazhi që morën ishte nga ajo. Ai ndau me policinë komunikimet:
-24 gusht: Gabby merr të ëmën në FaceTime dhe i thotë se po largohet nga Utah për në Wyoming.
-25 gusht: Ka shumë tekste mes Gabby-t dhe nënës së saj. Familja beson se ajo gjendej në Tetons në atë kohë.
-27 gusht: Më shumë mesazhe mes Gabby-t dhe nënës së saj, gjatë të cilave familja beson se ajo mbetet në Tetons.
-30 gusht: Familja merr mesazhin e fundit nga Gabby. Ata dyshojnë se nuk ka qenë ajo që e ka shkruar mesazhin. Sipas Stafford, në mesazh shkruhej: "Nuk ka valë në Yosemite.”
1 shtator
Brian kthehet në shtëpinë e çiftit në North Port, ku jetojnë edhe prindërit e tij, më 1 shtator, sipas policisë.
11 shtator
Pasi nuk ishte në gjendje të lidhej me të, familja Petito - e cila jeton në New York - e raporton atë të zhdukur. Autoritetet shkojnë në shtëpinë e Brian atë natë dhe kërkojnë të flasin me të dhe familjen e tij, por "në thelb na u dha informacioni për avokatin e tyre", thotë Taylor, zëdhënës i policisë.
16 shtator
Në një letër të lexuar nga avokati i familjes Petito gjatë një konferencë për shtyp të mbajtur nga policia, familja e vajzës së zhdukur i lutet familjes së Brian të ndihmojë në hetim. "Ju lutemi, nëse ju ose familjes tuaj ju ka mbetur ndonjë mirësjellje, ju lutemi, na tregoni se ku ndodhet Gabby," thotë Stafford. "Na tregoni nëse ne po kërkojmë në vendin e duhur. E tëra që duam është që Gabby të kthehet në shtëpi. Ju lutemi na ndihmoni.”
Ai thotë se familja Petito iu drejtua familjes së Brian Laundrie-s në fillim të muajit për informacion mbi vendndodhjen e Gabby-t, por familja e tij nuk pranoi të përgjigjej.
17 shtator
Pas disa ditësh që familja Petito dhe policia iu lutën familjes Laundrie që të bashkëpunonte në hetim, familja e Laundrie i kërkon policisë të vijë në shtëpinë e tyre, ku ata thonë se nuk e kanë parë Brian që nga 14 shtatori. Avokati i familjes Laundrie, Steven Bertolino, tha për CNN se "vendndodhja e Brian Laundrie është aktualisht e panjohur. Deri tani FBI po kërkon për Gabby-n dhe Brian."
Autoritetet lokale dhe federale nisin një kërkim për 23-vjeçarin. "Është e rëndësishme të theksohet se teksa Brian është një person me interes në zhdukjen e Gabby, ai nuk kërkohet për një krim,” tha policia në Twitter. "Ne nuk jemi duke punuar me një hetim krimi. Ne tani jemi duke punuar mbi një zhdukje të shumëfishtë.”
18 shtator
FBI njofton se agjencia dhe partnerët e saj po kryejnë gjithashtu sondazhe në terren në Parkun Kombëtar Grand Teton. Parku kombëtar është vendi ku Petito besohet të ketë qenë para komunikimit të saj të fundit me familjen.
19 shtator
Eshtrat e një njeriu u zbuluan në Teton, Wyoming, të cilat janë “në përputhje me përshkrimin” për 22-vjeçaren e humbur Gabby Petito, thanë zyrtarët e FBI-së në një konferencë shtypi. "Identifikimi i plotë mjeko-ligjor nuk ka përfunduar për të konfirmuar 100% se e kemi gjetur Gabby-n, por familja e saj është njoftuar për këtë zbulim," tha FBI. Autopsia pritet të identifikojë eshtrat dhe të përcaktojë shkakun e vdekjes. Kërkimet për Brian vazhdojnë ende.
20 shtator
Prindërit e Brian Laundrie, Christopher dhe Roberta, merren në pyetje në shtëpinë e tyre nga FBI-ja. Autoritetet kontrollojnë shtëpinë me orë të tëra.
Autoritetet e Utah-s publikuan në media një regjistrim të një telefonate në 911 më 12 gusht, data kur policia në Moab pati një takim me çiftin. "Ne kaluam me makinë dhe zotëria po godiste vajzën", i thotë telefonuesi një operatori të 911-s. "Pastaj ne u ndalëm. Ata vrapuan. Ai vazhdoi ta godiste, hipi në makinë dhe ata u larguan."
Policia ka zbuluar se përpara se të zhdukej, Gabby dërgoi mesazhe të shumta me tekst dhe pati shumë biseda me nënën e saj përmes telefonit celular gjatë udhëtimit, ku vihej re se kishte gjithnjë e më shumë tension mes çiftit.
Përditësuar këtu: Rasti ‘Gabby Petito’: FBI konfirmon vrasjen e 22-vjeçares
Burimet: New York Times, Guardian, CNN, Reuters
