Dhjetëra mijëra njerëz protestojnë në mbarë botën për të mbështetur Ukrainën
Në qytete si Santiago, Vancouver Paris dhe New York, dhjetëra mijëra qytetarë kanë dalë në mbështetje të Ukrainës, duke kërkuar fundin e pushtimit rus. Rreth 41,600 njerëz demonstruan në 119 protesta në qyteza dhe qytete në të gjithë Francën, sipas vlerësimeve të Ministrisë së Brendshme. Në Paris, 16,000 u mblodhën në Place de la Bastille.
Në një tubim në Zyrih morën pjesë 40,000 njerëz, njoftoi agjencia e lajmeve ATS e Zvicrës. Qindra dolën gjithashtu në Londër, duke përfshirë ukrainas, familjet e të cilëve u detyruan të largoheshin nga bombat ruse. Në qendër të Romës, sindikatat dhe organizatat u mblodhën në një "proces të madh paqeje", duke demonstruar kundër Putinit, por edhe NATO-s.
Përtej oqeanit Atlantik, disa mijëra njerëz u mblodhën në Times Square në New York. Ata mbanin luledielli, lulen kombëtare të Ukrainës, dhe banderola ku shkruhej “Stop terrorizmit rus”.
Forcat ruse në pauzë; mund të përgatiten për operacione të tjera
Forcat ruse në Ukrainë mund të kenë hyrë në një pauzë operacionale ndoshta të shkurtër ndërkohë që përgatiten të rifillojnë operacionet kundër Kievit, Kharkivit, Mykolayiv-it dhe ndoshta Odesa-s në 24-48 orët e ardhshme, sipas një instituti kërkimor me qendër në SHBA. Një raport i publikuar së fundmi nga Instituti për Studimin e Luftës, pohon:
“Trupat ruse nuk filluan operacione të mëdha sulmuese tokësore kundër Kievit, Kharkivit ose Mykolayivit në 24 orët e fundit. Forcat ukrainase pranë Kharkivit, nga ana tjetër, kryen një kundërsulm që thuhet se depërtoi në kufirin ukrainas-rus.”
Zelenskyy i bën thirrje SHBA-së që të dërgojë avionë në Ukrainë
Presidenti i Ukrainës, Volodymyr Zelenskyy, u bëri thirrje ligjvënësve amerikanë që të ndihmojnë në sigurimin e avionëve për të mbrojtur vendin kundër pushtimit rus gjatë një video-takimi me anëtarët e Kongresit të shtunën.
Chuck Schumer, udhëheqësi i shumicës në Senat, tha se Zelenskiy "bëri një lutje të dëshpëruar" për ndihmën ushtarake, e cila do të përfshinte avionë, drone dhe raketa anti-ajrore. Presidenti ukrainas vlerësoi sanksionet e vendosura ndaj Rusisë gjatë takimit, por u bëri presion ligjvënësve amerikanë që të shkojnë më tej duke ndaluar importet e naftës nga Moska.
Gjyqtarja e parë femër kryeson seancën në gjykatën e lartë në Egjipt
Radwa Helmi ka bërë histori si gjyqtarja e parë femër që ulet në stolin e këshillit shtetëror të Egjiptit, një gjykatë e lartë në vendin arab.
Helmi, duke u paraqitur në një gjykatë në Kajro, ishte mes 98 grave të emëruara vitin e kaluar për t'iu bashkuar këshillit, një nga organet kryesore gjyqësore të Egjiptit, pas një vendimi të presidentit egjiptian, Abdel Fattah al-Sisi.
Gratë në Egjipt janë përballur me një betejë të vështirë për vite me radhë për të siguruar të drejtat e tyre.
