Çfarë është saktësisht një gjuhë dashurie? A njihni dikë që do të donte që dikush t’i pastronte kuzhinën në vend që t’i çonte lule? Kjo ndodh sepse gjuhët e dashurisë ndryshojnë.

Të gjithë ne e shprehim dhe e marrim dashurinë ndryshe dhe këto dallime mund të jenë arsyeja pse ndjenjat dhe qëllimet e mira ndonjëherë nuk vihen re. Për shembull, ju kaloni javë duke u përpjekur të gjeni dhuratën më të bukur për partnerin/en, por në ditëlindje ai/ajo thotë se thjesht "Do ishte i/e lumtur nëse do strukeshit në divan së bashku.”

Kjo nuk do të thoshtë domosdoshmërisht se ai/ajo është mosmirënjohës/e, por thjesht e komunikon ndryshe dashurinë ose ka një gjuhë tjetër dashurie. Cilat janë llojet e ndryshme të gjuhëve të dashurisë?

Janë pesë gjuhë dashurie që u prezantuan për herë të parë në vitin 1992 nga këshilltari i martesës Dr. Gary Chapman në librin e tij "5 gjuhët e dashurisë".

- fjalët
- kohë cilësore
- prekje fizike
- akte shërbimi
- dhuratat

Fjalët si gjuhë dashurie

Gjuha e parë e dashurisë është fjala dhe ka të bëjë me shprehjen e dashurisë dhe vlerësimit përmes fjalëve, qofshin ato të folura apo të shkruara. Shembuj:

- Të dua!
- Jam krenar/e për ty.
- Faleminderit që je miku im më i mirë!

Koha cilësore si gjuhë dashurie

Koha cilësore është gjuha e dytë e dashurisë dhe lidhet me vlerësimin e kohës cilësore së bashku. Një person, gjuha e dashurisë së të cilit është koha cilësore, mund të ndihet më i dashur dhe i vlerësuar kur njerëzit për të cilët interesohet gjejnë kohë për të qenë së bashku dhe i kushtojnë vëmendje. Koha cilësore mund të jetë një nga gjuhët tuaja të dashurisë nëse:

- Ndiheni të shkëputur kur nuk kaloni mjaftueshëm kohë me dikë.
- Nëse nuk shpenzoni mjaftueshëm kohë me partnerin/en ndikon në kënaqësinë tuaj (qoftë edhe seksuale).

Pavarësisht se çfarë jeni duke bërë, koha cilësore kërkon të jeni plotësisht të pranishëm dhe pa shpërqendrime. Ja disa shembuj të shprehjes së dashurisë përmes kohës cilësore:

- Përqafoheni së bashku në shtrat për disa minuta çdo mëngjes para se të ngriheni.
- Takoheni rregullisht.
- Fikni telefonin kur jeni duke biseduar për diçka.
- Keni një ritual të përditshëm/të përjavshëm që ia dedikoni njëri-tjetrit.

Prekja fizike si gjuhë dashurie

Prekja fizike është gjuha e tretë e dashurisë. Le të jemi të qartë se bëhet fjalë për një prekje fizike të përshtatshme për të cilën të dyja palët janë dakord. Kontakti fizik mund të jetë gjuha juaj e dashurisë nëse:

- Ju ndiheni të vetmuar ose të shkëputur kur nuk merrni dashuri fizike nga partneri/ja.
- Ndiheni veçanërisht të dashuruar kur dikush ju puth ose ju përkëdhel.

Ja disa shembuj të shpreshjes së dashurisë përmes prekjes fizike:

- Putheni për t’u përshëndetur.
- Kaloni pak kohë duke u përqafuar në shtrat para dhe pas gjumit.
- I jepni përparësi seksit, edhe nëse duhet ta planifikoni atë.
- Përdorimi i prekjes si ngushëllim.

Aktet e shërbimit si gjuhë dashurie

Aktet e shërbimit janë gjuha e katërt e dashurisë. Ja disa shenja se aktet e shërbimit mund të jenë gjuha juaj e dashurisë:

- Ndiheni mirë kur partneri/ja u ndihmon me një punë të përditshme pa pasur nevojë të pyesni.
- U gjendeni të tjerëve pranë sa herë kanë nevojë.
- I lini të tjerët që ta zgjedhin filmin.
- Blini lule, verë, çokollata ose çfarëdo gjëje tjetër të preferuar.
- Të kujdesesh për fëmijën e dikujt në rast se ka nevojë.

Aktet e shërbimit nuk kanë të bëjnë me gjeste madhështore, por me gjeste të menduara, si p.sh. t'i bësh kafenë në mëngjes.

Marrja e dhuratave si gjuhë dashurie

Për personat që kanë dhuratat si gjuhë dashurie, domethënia shkon përtej dëshirës vetëm për gjëra. Për këtë person, gjithçka ka të bëjë me kuptimin e dhuratës dhe mendimin që lidhet me të. Nuk kërkohen diamante apo makina luksoze. Shenjat që tregojnë se marrja e dhuratave është gjuha juaj e dashurisë:

- Kur bëhet fjalë për dhënien e dhuratave, ju mendoheni mirë për të gjetur diçka të veçantë.
- Ju vlerësoni gjithçka që ju jep partneri/ja, sado e vogël qoftë.
- Lëndoheni kur dikush që e doni nuk e përkujton një ngjarje me diçka të menduar.
- I surprizoni të tjerët me lule, karamele, ëmbëlsira.
- Zgjidhni dhurata që janë personale për marrëdhënien tuaj.

Burimi: Healthline