Në një intervistë të rrallë, Dafina Zeqiri foli për marrëdhënien e saj me DJ Geek dhe planet për t’u bërë prindër. Në “Why Not” me Roza Latin, Dafina tregoi se pse ka vendosur ta bëjë publike lidhjen e dashurisë.

Këngëtarja u shpreh se nuk ka qejf “ta shprehë dashurinë në kafaz” dhe kurdo që dalin, përpiqen të jenë vetvetja, kalojnë mirë dhe nuk i vendosin limite njëri-tjetrit.

Në lidhje me vendimin për t’u bërë prindër, Dafi shtoi se as familja e saj dhe as familja e DJ Geek nuk i kanë bërë presion, por kanë respektuar privatësinë e tyre. Megjithatë, duket se planet për fëmijë nuk janë të largëta.

“Nuk ka lidhje nëse është djalë apo vajzë, mjafton të jetë shëndoshë e mirë. E kam ndjerë mungesën e një vëllai në fëmijëri dhe gjithmonë kam thënë që dua një çun, por tani them dua një gocë, një mini-Dafina. Ndoshta edhe më mirë të jenë binjakë, një vajzë dhe një djalë,” tha Dafi duke qeshur.

Thashethemet e para për marrëdhënien e Dafinës dhe DJ Geek nisën në qershor të vitit 2019. Në korrik të po atij viti, Dafi e mohoi lidhjen. Në dhjetor, e konfirmoi tërthorazi, ndërsa në shkurt 2020 e pranoi publikisht. Dy muaj më vonë, gjatë një interviste për Revistën Story, foli për ndarjen.

"Ishte një lidhje shumë e shkurtër, që përfundoi shpejt. Mesa duket nuk shkojnë bashkë edhe puna edhe lidhja romantike, prandaj vendosa që puna dhe ekipi është më e rëndësishme se lidhja. Mendojmë të mbajmë ekipin sa më të shëndetshëm sepse ne jemi si një familje. Kështu që u desh t'i japim fund lidhjes për të shpëtuar lidhjen në ekip, që për ne është më e rëndësishme.”

Në qershor 2020, e ftuar te “Në kurthin e Piter Pan” u shpreh se është “ende e dashuruar” dhe “ka një dashuri shumë të madhe dhe është ende [në zemër]”. Dashuria shumë e madhe ishte sigurisht Geek, prandaj jo më kot janë sërish bashkë.