Këngëtari Endri Prifti, përmes një postimi në rrjete sociale, ka pretenduar se di fituesit e “Festivalit të Këngës” dhe “Këngës Magjike”.

“Ju thamë në disa momente që ne do të ishim pjesë e ‘Këngës Magjike’ këtë vit, por rrethanat as nuk e morëm vesh pse nuk jemi. D.m.th e kupton ti, nga ato furçat me bojë,” shkruan ai.

Në vijim të postimit, ai shtoi se fituese e “Këngës Magjike” do të jetë Marsela Çibukaj, ndërsa fituesit e “Festivalit të Këngës” do të jenë Noizy në bashkëpunim me Eugent Bushpepën.

Më pas, Prifti ka ndryshuar postimin duke hequr emrat e këngëtarëve. Për momentin, është e paqartë nëse këngëtarët e përmendur do të marrin pjesë në festivalet përkatëse; nëse po, a do të shpallen fitues sepse janë paracaktuar, siç pretendon Prifti, apo thjesht e meritojnë fitoren.