Inteligjenca artificiale ka krijuar imazhe se si duken burri dhe gruaja “perfekte” dhe njerëzit nuk janë shumë të lumtur për këtë dhe me të drejtë – nuk ka një pamje të përsosur apo një standard ideal.

Projekti për të krijuar njerëzit “perfektë” u realizua nga The Bulimia Project - një organizatë për ndërgjegjësimin mbi çrregullimet e të ngrënit - e cila paralajmëroi paraprakisht se rezultatet e eksperimentit të tyre të vogël ishin "kryesisht jorealiste".

Njerëzit janë të indinjuar me faktin se sa shumë promovohen disa tipare – si ngjyra e bardhë e lëkurës, trupi i dobët dhe me muskuj, buzët e trasha, sytë me ngjyrë etj. Kjo qasje ndikon negativisht te vetëbesimi dhe imazhi që njerëzit krijojnë për trupin e tyre.

Përpos kësaj, në rezultate mungon diversiteti në raca, forma trupore, modele flokësh dhe karakteristika të tjera fizike.

“Duke marrë parasysh që rrjetet sociale përdorin algoritme, është e lehtë të merret me mend se pse interpretimet e inteligjencës artificiale rezultuan në imazhe të seksualizuara,” tha The Bulimia Project.

“Mund të supozojmë se inteligjenca artificiale krijoi këto versione sepse platformat e rrjeteve sociale promovojnë disa tipare të caktuara trupore.”