Olivia Rodrigo publikoi albumin e saj të ri "Guts" të premten, por një këngë në veçanti ka marrë shumë vëmendje.

Njerëzit në internet po spekulojnë se kënga “The Grudge” është shkruar për një konflikt të përfolur mes Olivia-s dhe Taylor Swift.

Në “The Grudge” (grudge – mëri; ndjenjë e vazhdueshme pakënaqësie që shkaktohet nga një fyerje a lëndim në të kaluarën), Olivia këndon për një marrëdhënie të acaruar me dikë që dikur e adhuronte, duke pranuar në fund se "edhe pas gjithë kësaj, ti je ende gjithçka për mua".

Por çfarë ka ndodhur?

Në fillim të karrierës së saj muzikore, Olivia Rodrigo u shfaq me pasion si një fanse e zjarrtë e Taylor Swift. Në intervista të mëvonshme, u shpreh se kishte marrë një shënim të shkruar me dorë nga Taylor për suksesin e këngës së saj “Driver’s License”.

Por në maj të vitit 2021, kur u publikua albumi debutues i Olivia-s, “Sour”, njerëzit vunë re një ngjashmëri mes këngës “1 Step Forward, 3 Steps Back” me këngën “New Year’s Day” të Taylor. Më vonë, u pranua publikisht roli kontribues i Taylor në prodhimin e këngës.

Në “The Grudge”, Olivia i referohet një të “premteje maji” kur “e gjithë bota e saj ndryshoi pas një telefonate”. Në rast se nuk e dinit, “Sour” u publikua më 21 maj 2021, që ishte e premte.

“Kam makthe çdo javë për atë të premte maji
Një telefonatë nga ti dhe e gjithë bota ime ndryshoi
Besimi që tradhtove, konfuzioni që vazhdon ende
More gjithçka që doja dhe e shkatërrove mes gishtave të tu”

Në korrik të vitit 2021, fansat vunë re një ngjashmëri midis këngës “Deja vu” të Olivia-s dhe këngës “Cruel Summer” të Taylor Swift dhe e akuzuan atë për shkelje të të drejtave të autorit. Taylor dhe tekstshkruesit Jack Antonoff dhe St.Vincent u njohën si kontribues përmes asaj që njihet si retroactive credit - një praktikë e zakonshme që tekstshkruesve t’u njihet kontributi për këngët, shpesh për të shmangur procedurat e kushtueshme të plagjiaturës.

Në shtator 2021, Billboard raportoi se Rodrigo kishte hequr dorë nga miliona dollarë honorare për shkak të njohjes së kontributit të njerëzve të tjerë në këngët e saj.

Më pas, në një intervistë për Rolling Stone me Alanis Morissette në tetor 2021, Olivia zbuloi se mes suksesit të saj, ajo kishte mësuar se njerëzit që dikur i donte në industrinë e muzikës janë në të vërtetë "vajza të liga".

“Oh, a mendon se i kam merituar të gjitha?
Oh, lulet e tua të mbushura me vitriol
Më ngrite lart për të më parë të rrëzohesha
Ti ke gjithçka dhe dëshiron akoma më shumë" - thotë ajo në "The Grudge".

Me vitrol, Olivia ka të ngjarë të synojë një kuptim të dyfishtë, pasi vitrol nënkupton “kritikë të hidhur” ose “keqdashje” ose (fjalë për fjalë) acid sulfurik. Me fjalë të tjera, ajo po thotë se ndonëse personi dukej sikur e mbështeste, në të vërtetë ishte një ujk nën petkun e deles.

“Ti ke gjithçka dhe dëshiron akoma më shumë” është interpretuar nga njerëzit si fakti që Taylor është padyshim një nga yjet më të mëdhenj në planet, por megjithatë donte kredite në punën e një këngëtareje të re.

Jo vetëm “The Grudge”, por kënga “Vampire”, ka të bëjë me Olivia-n që ndihet e përdorur dhe e verbër nga dikush që dikur e donte dhe njerëzit argumentuan se i gjithë koncepti i këngës mund të ishte një metaforë për paratë (50%) që Taylor fitoi për një nga hitet më të mëdha të Olivia-s.

Olivia u pyet drejtpërdrejt në lidhje me teorinë se "Vampire" ka të bëjë me Taylor në një intervistë me Guardian.

“Si t’i përgjigjem kësaj? Dua të them, kurrë nuk dua të them se për kë janë këngët e mia. Unë nuk e kam bërë kurrë këtë më parë në karrierën time dhe ndoshta nuk do ta bëj kurrë. U befasova shumë kur njerëzit e menduan këtë,” tha ajo.

Njerëzit kuptuan menjëherë që Olivia jo vetëm që nuk e mohoi teorinë, por gjithashtu nuk shfrytëzoi rastin për të hedhur poshtë spekulimet në rritje për raportin e saj me idhullin e mëparshëm.