Sa njerëz mund t’i rezistojnë një kafeje latte që e porositni në barin ku jeni ulur me miqtë? Po një pijeje tjetër freskuese gjatë një dreke familjare? Keni dëgjuar për rreziqet që mund t’i vijnë organizmit nga akulli që u hidhet këtyre pijeve që shërbehen jashtë shtëpisë, pra në bare e restorante të ndryshme?

Nëse i bëni vetë në shtëpi kubet e akullit, nuk ka asnjë shqetësim, por problemet fillojnë tek makineritë e prodhimit të akullit apo kur ai preket nga duart e pista.

Dr. Bryan Quoc Le, një shkencëtar ushqimor shpjegoi për HuffPost se: "Akulli që është trajtuar në mënyrë jo të duhur mund të marrë myk, baktere dhe viruset nga duart e kamerierëve ose kuzhinierëve që i shërbejnë. Akulli mund të marrë mikroorganizma nga ajri ose ena që nuk lahet dhe pastrohet siç duhet”.

Baret, restorantet apo hotelet shpesh përdorin makina akulli për të prodhuar kube akulli dhe si shumica e makinerive, ato duhet të pastrohen. Le thekson: “Makinat e akullit duhet të pastrohen dhe sterilizohen rregullisht. Nëse ka ndonjë ndotës të mundshëm në vetë makinën e akullit, këto mund të përhapen në pjesën që prodhohet. Shembujt përfshijnë mykun dhe bakteret në tubacione”.

A mund të na sëmurë akulli?

"Myku në akull mund të shkaktojë sëmundje të frymëmarrjes dhe reaksione alergjike," tha Le. Myku mund të shërbejë edhe si burim për rritjen e baktereve dhe mikroorganizmave të tjerë patogjenë.

A duhet të shmangim akullin në bare dhe restorante?

Pavarësisht nga historitë e tmerrshme të makinave të mykura të akullit dhe atij të ndotur, ekspertët vënë në dukje se njerëzit nuk duhet të alarmohen për këtë fakt.

Dr. Le vijon se: “Makinat e akullit janë zakonisht mjaft të sigurta për sa kohë që monitorohen dhe dezinfektohen rregullisht. Ky nuk është një shqetësim alarmant në krahasim me shpërthimet e helmimeve nga ushqimi”.