Çmimi Nobel në Fiziologji ose Mjekësi për vitin 2023 u është dhënë shkencëtarëve Katalin Kariko dhe Drew Weissman, të cilët krijuan teknologjinë mRNA e cila u përdor për krijimin e vaksinave të Covid.

Teknologjia ishte në fazat eksperimentale përpara pandemisë, por tani është përdorur për miliona njerëz në mbarë botën për t'i mbrojtur ata nga Covid-19.

E njëjta teknologji mRNA po hulumtohet për sëmundje të tjera, përfshirë kancerin.

Komiteti i Çmimit Nobel tha: “Laureatët kontribuan në zhvillimin e vaksinave gjatë një prej kërcënimeve më të mëdha për shëndetin e njeriut në kohët moderne”.

Vaksinat trajnojnë sistemin imunitar për të njohur dhe luftuar viruset ose bakteret. Gjatë pandemisë së Covid, vaksinat Moderna dhe Pfizer/BioNTech bazoheshin në teknologjinë mRNA.

Teknologjia mRNA i udhëzon qelizat në trup të prodhojnë proteina specifike. mRNA në thelb përdor trupin tonë dhe proceset biologjike për të trajtuar sëmundjet dhe për të parandaluar infeksionet.