Victoria Beckham ka folur për herë të parë për dhimbjen që ndjeu pas pretendimeve se David e kishte tradhtuar.

Victoria tregon për dokumentarin e ri të Netflix, “Beckham”, se ajo ishte periudha më e vështirë e jetës së saj dhe asokohe përjetoi fazën më të palumtur të jetës.

Në vitin 2003, David u transferua në Spanjë për të luajtur për Real Madridin, ndërsa Victoria mbeti në Mbretërinë e Bashkuar me djemtë e tyre, Brooklyn dhe Romeo. Asokohe, dy gra - Rebecca Loos dhe Sarah Marbeck - pretenduan se kishin lidhje me futbollistin.

Menjëherë pasi lajmet filluan të qarkullonin, Victoria vendosi të zhvendosej në Spanjë për të qenë në krah të Davidit.

Çifti Beckham gjithmonë i ka mohuar pretendimet për tradhti, por tani kanë folur sinqerisht për betejën për të shpëtuar marrëdhënien e tyre.

“Ishte periudha më e vështirë sepse dukej sikur bota ishte kundër nesh,” thotë ajo në dokumentar. “Para Madridit, ndiheshim si ne kundër gjithë të tjerëve, por ishim bashkë, ishim të lidhur, kishim njëri-tjetrin. Por kur ishim në Spanjë, nuk më dukej sikur kishim njëri-tjetrin. Dhe kjo është e trishtë. Nuk mund t'ju tregoj se sa e vështirë ishte dhe si ndikoi tek unë. Ishte një makth.”

E pyetur nëse “e kishte inat” burrin e saj, ajo u përgjigj: “Të jem plotësisht e sinqertë, po. Isha në fazën më të palumtur që kam qenë ndonjëherë.” Megjithatë, ajo theksoi se u përpoq ta merrte veten në mënyrë që të mbështeste bashkëshortin dhe karrierën e tij.

“Ishte hera e parë që unë dhe Victoria ishim vënë nën atë lloj presioni në martesën tonë,” u shpreh David Beckham. “Unë nuk e di se si e kaluam, me sinqeritet të plotë. Victoria është gjithçka për mua, ta shihja të lënduar ishte tepër e vështirë, por ne jemi luftëtarë dhe në atë kohë kishim nevojë të luftonim për njëri-tjetrin, duhej të luftonim për familjen tonë.”

Ai vazhdoi, "Dhe ia vlente të luftonim për çfarë kishim.”

Victoria dhe David përfundimisht i kapërcyen vështirësitë. Rreth një vit pas shpërnguljes së saj në Spanjë, ata sollën në jetë djalin e tyre të tretë, Cruz, në shkurt 2005. Çifti i fuqishëm – të cilët janë të martuar prej 24 vitesh – zgjeruan sërish familjen në vitin 2011 duke u bërë prindër të vajzës Harper.