Dielli na ka dhënë kaq shumë. Për shembull: Lulet, lindjet, perëndimet, vitaminën D, por edhe ca probleme, të cilat pavarësisht gjithë bujarisë së diellit, sërish i detyrojnë njerëzit që të mbrohen nga ky yll kaq i afërt me Tokën. Për t’u mbrojtur nga dielli nuk të duhet më shumë se një krem SPF, i cili të mbron nga rrezet ultravjollcë, nga moshimi i parakohshëm i lëkurës, rrudhat dhe kanceri në lëkurë.
Ç’do të thotë ‘SPF’?
SPF në një krem dielli është faktori mbrojtës (sun protection factor) dhe tregon se sa mbrojtje ofron produkti ndaj diellit. Ndërsa kremi kundër diellit krijohet në laboratorë, SPF vendoset sipas kohëzgjatjes që arrin ta mbrojë lëkurën kundër djegies nga dielli, shpjegon Dr. Arash Akhavan, dermatologe e certifikuar dhe themeluese e “The Dermatology and Laser Group”.
Gjithsesi, duhet saktësuar se SPF nuk lidhet me kohëzgjatjen e ekspozimit në diell, por me kohën kur ekspozohesh gjatë ditës. Në mesditë, rrezet e diellit janë shumë më të forta sesa në mëngjes. Sigurisht, varet edhe nga vendndodhja. Shtetet afër poleve kanë më pak diell dhe rrjedhimisht, më pak ekspozim ndaj tij.
Mbrojtja ndaj diellit varet edhe nga tipi i lëkurës së personit dhe se sa shpesh e riaplikon.
Ndryshimi mes SPF-ve
Nivelet e SPF varen nga mbrojtja që ato i bëjnë lëkurës nga rrezet ultravjollcë. Ekspertët shpjegojnë se:
SPF 15 bllokon 93% të rrezeve UV
SPF 30 bllokon 97% të rrezeve UV
SPF 50 bllokon 98% të rrezeve UV
SPF 100 bllokon 99% të rrezeve UV
A ka rëndësi niveli i SPF që përdor
Dr. Akhvan rekomandon të përdorësh nivelin më të lartë të SPF me të cilin ti ndihesh rehat. Sipas National Health Service, këshillohet që minimumi i nivelit të SPF të jetë ai 30. Pra, nga 30 e sipër.
Fytyra dhe trupi kanë nevojë për SPF të ndryshme?
Dr. Akhvan thekson se nuk është domosdoshmërisht e nevojshme, nëse SPF është +30. Por, SPF për fytyrën kanë zakonisht tjetër formulë, pasi përshtaten me përdorimin e makeup-it, si dhe mund të jenë rezistente ndaj ujit. Një SPF rezistente ndaj ujit është ideale për fytyrën. Ndërsa sa i përket trupit, SPF janë zakonisht me një teksturë më të trashë dhe mund të lënë shenja të bardha.
Kush duhet të përdorë krem kundër diellit?
Praktikisht, çdo njeri që është mbi 6-muajsh. Për bebet nën 6-muajshe rekomandohet që të qëndrojnë në hije dhe të vishen me rroba që kanë materiale që i mbrojnë nga dielli. Për këdo tjetër, një krem dielli me SPF 30 ose më sipër është tejet e nevojshme.
Edhe një sqarim: Njerëzit që kanë tone më të errëta lëkure dhe kanë tendencën të digjen më ngadalë nga dielli, nuk do të thotë që nuk do të preken nga problemet dhe kanceri i lëkurës, ndaj nuk mund të shpëtojnë nga përdorimi i SPF.
Sa SPF të duhet?
Me shumë gjasa, më shumë nga ç’mendon. Për çdo aplikim, ekspertët rekomandojnë një sasi të tillë:
1 gotë shot për trupin
½ lugë çaji për fytyrën dhe qafën/ 3 vija të bollshme në 3 gishta.
Sa shpesh duhet të riaplikosh SPF?
Çdo dy orë nëse je në plazh apo djersin shumë. 3 orë në rast se ndodhesh në zona të tjera dhe nuk e ke shumë problem djersën.
Artikuj të sugjeruar:
