FOTO: Irving Penn

Në një botë të fiksuar pas proteinave, zgjidhni më mirë fibrat! Këtë nuk e kemi shpikur ne nga mendja jonë, por është fjala e ekspertëve dhe statistikat ato që zbulojnë se gati 95% e njerëzve kanë mungesë të fibrave në regjimin e tyre ushqimor. “Fibrat janë një superushqim,” thotë mjekja Emily Leeming.

Pse fibrat janë të rëndësishme për shëndetin tonë?

Fibrat ndikojnë në një rrezik më të ulët për shumë sëmundje, nga ato të zemrës, diabetit të tipit II dhe kancerit. Ato njëherësh ngadalësojnë çlirimin e energjisë në qarkullimin e gjakut, duke mbajtur të qëndrueshme nivelet e sheqerit në gjak, në mënyrë që të ndiheni të ngopur dhe me energji sa më gjatë.

Si t’i përfshini fibrat në ditën tuaj?

Ju nuk keni nevojë të hani sallata në çdo vakt për të marrë 30 gramë fibra të rekomanduara në ditë. Në vend të kësaj, tregohuni më të zgjuar duke shtuar ushqime që i përmbajnë ato më shumë, si frutat, perimet, drithërat, fasulet, arrat etj.

Shtatë ushqimet e pasura me fibra:

-Fibrat prebiotike

“Disa lloje fibrash ushqejnë bakteret e mira të zorrëve dhe këto quhen fibra prebiotike,” thotë Leeming. Këto gjenden në ushqime si hudhrat, qepët, preshi, shpargujt dhe fasulet.

-Bukë thekre

Shumica prej nesh nuk mund ta imagjinojnë një jetë pa bukë dhe me thënë të drejtën, është e shijshme. Por, zgjidhni bukë thekre, pasi vetëm një fetë përmban gjashtë gramë fibra, që ju mban të ngopur dhe energjikë gjatë ditës.

-Fasule të zeza

“Fasulet e zeza kanë shumë fibra dhe janë një nga burimet më të fuqishme të polifenoleve, një grup anti-oksidantësh që ushqejnë gjithashtu bakteret e zorrëve tuaja,” shpjegon mjekja. Një filxhan në ditë thuhet se ndikon në shëndetin e mirë të zorrëve dhe ul inflamacionin.

-Mjedra

Mjedrat nuk janë vetëm të shijshme, por janë gjithashtu të pasura me fibra, falë farave që kanë. Përveç kësaj, ato janë të pasura me anti-oksidantë dhe vitaminë C dhe të ulëta në nivelin e sheqerit. Luleshtrydhet, boronicat dhe manaferrat janë njëherësh opsione të shkëlqyera të pasura me fibra.

-Drithërat e plota

Drithërat e tilla si elbi apo quinoa janë fantastike për të ndihmuar në rritjen e sasisë së fibrave që i duhet organizmit. Super të ngopura, drithërat e plota funksionojnë jashtëzakonisht mirë në vend të karbohidrateve tradicionale, si orizi ose makaronat.

-Avokado

Avokado përmban më shumë fibra se shumica e frutave dhe perimeve dhe është një burim i mirë i yndyrave të shëndetshme, të cilat të dyja mbështesin shëndetin tuaj të përgjithshëm.

-Farat Chia

100 gramë fara Chia kanë 34 gramë fibra dhe shtimi i tyre në pjata apo gatime të ndryshme, rrit njëherësh edhe nivelin total të fibrave që ju duhen.

Artikuj të sugjeruar:

Burimi: Vogue