Timo Flloko, mik i shkrimtarit të ndjerë Ismail Kadare, i ka kushtuar kolosit të letërsisë një poezi emocionuese, ku ka rrëfyer ndjesitë e tij në një mëngjes bosh, pas trishtimit që la pas humbja e Kadaresë.

Poezia:

Timo Flloko - KADARE (Requiem)

E piva kafen e helmët pa ty, këtë mëngjes,
Dhembjen, fillikat, me kë ta ndaja,
“Chateau Juvenilja” tek e shoh më ngjan,
Më shkretëtirë se Saharaja...

Ike heshtjes si gjigant, i menduar
(Bëre vallë pakt të fshehtë me ikjen?!)
Le bosh pas vetes, në mijëra zemra,
Zbrazëti pa skaj, apokaliptike...
(Pse vijnë gjenitë dhe ikin nga kjo botë..?!)

Ikja jote është shtegëtim qiellor,
Vdekjen s'mund as ta imagjinoj dot!
Mortin s'mund ta marr as me mend..
Një zog erdh' a m'u faneps

Fluturimin ndali, u ul në vendin tënd,
(Të ish hij' e Nobelit ai udhëhumbës,
Me pendesën në vete, një gjasë aq e rrallë,
U nis por mbërriti vonë, nga erërat që frynin
Korb u bë nga mërzia, se s'të gjeti gjallë...)

U përmenda në fund, humbës në atë bosh,
Hodha sytë në qiell, përtej, te e panjohura,
Me pafundësinë u shkri, atje përjetshëm,
Shpirti yt shteg'tar që kapërcen kohërat.

Ismail Kadare ndërroi jetë në mëngjesin e 1 korrikut 2024, duke lënë pas një krijimtari që na krenon. Ai ka prezantuar denjësisht Shqipërinë kudo në botë, përmes veprave të tij të pakoha, ndaj humbja e tij është vetëm fizike. Kadare u përcoll për në banesën e fundit nga personalitete të njohur, artistë, familjarë e miq, të cilët i dhanë lamtumirën një prej gjenive të letërsisë.

Për nder të tij, Shqipëria vendosi dy ditë zie, 2 dhe 3 korrikun dhe Kosova, një ditë zie - 3 korrikun.

Artikuj të sugjeruar: