Dy persona janë arrestuar në Vienë, Austri, këtë të mërkurë (7 gusht 2024), për shkak se planifikuan një sulm terrorist në një ndër koncertet e Taylor Swift, në stadiumin “Ernst Happel”. Një djalë 19-vjeçar, i cili ka nënshtetësi austriake dhe një i dyshuar tjetër, identiteti i të cilit ende nuk është bërë publik, janë arrestuar nga policia.

Sipas Franz Ruf, drejtues i departamentit të sigurisë publike në ministrinë e Brendshme, personat e arrestuar mund të kenë rënë pre e radikalëve islamikë përmes internetit. Është e paqartë se për çfarë arsyeje dy personat planifikonin të sulmonin në koncertin e Tay-t, por autoritetet konfirmuan se një prej shfaqjeve që i kishte shitur të gjitha biletat ishte shënjestra.

Taylor nuk ka komentuar ende mbi lajmet e fundit. Ndërkaq, janë anuluar të treja shfaqjet që ylli i muzikës pop do të mbante në kryeqytetin e Austrisë.

Përmes një postimi në Instagram, u njoftua se shfaqjet janë anuluar, pas konfirmimit të policisë për sulm terrorist. “Nuk kemi zgjedhje tjetër veçse të anulojmë të tre shfaqjet, për sigurinë e të gjithëve”, shkroi stafi organizues i eventit, duke shtuar se biletat do të rimbursoheshin. Ndërkohë, është e paqartë nëse koncertet do të zhvillohen në një moment të dytë.

Artikuj të sugjeruar: