Çmimi Nobel për Paqen i është dhënë “Nihon Hidankyo”, një lëvizjeje popullore e të mbijetuarve nga Hiroshima dhe Nagasaki. Përpjekjet e grupit kanë ndihmuar në krijimin e një “tabuje bërthamore,” tha komiteti i Nobelit.
Ja çfarë duhet të dini për “Nihon Hidankyo”
Organizata japoneze “Nihon Hidankyo” është lëvizje popullore e të mbijetuarve nga bombat atomike dhe Nobeli iu dha “për përpjekjet e saj për të arritur një botë të lirë nga armët bërthamore.”
“Nihon Hidankyo” ka përfaqësuar për dekada qindra mijëra të mbijetuar të bombave atomike të hedhura nga SHBA në Hiroshima dhe Nagasaki në vitin 1945. Këta të mbijetuar, të njohur si “hibakusha”, janë dëshmi e gjallë e tmerrit të sulmeve dhe kanë përdorur dëshmitë e tyre për të rritur ndërgjegjësimin mbi pasojat njerëzore të luftës bërthamore.
E themeluar 11 vjet pas përfundimit të Luftës së Dytë Botërore, “Nihon Hidankyo” filloi si një organizatë që përfaqësonte të mbijetuarit e sulmeve bërthamore, të cilët vazhduan të vuanin jo vetëm nga efektet fizike të rrezatimit, por edhe nga stigma sociale. Në 68 vitet që nga themelimi i saj, “Nihon Hidankyo” ka dërguar të mbijetuar në vende të ndryshme të botës për të ndarë përvojat e tyre mbi jetesën me efektet e ekspozimit ndaj rrezatimit nga një bombë atomike.
“Njerëzimi nuk duhet kurrë të shkaktojë apo të vuajë sërish sakrificat dhe torturat që kemi përjetuar ne,” tha grupi në deklaratën themeluese në vitin 1956.
I pyetur se çfarë mesazhi shpresonte të dërgonte komiteti i Nobelit duke i dhënë çmimin “Nihon Hidankyo”, teksa luftërat vazhdojnë në disa kontinente, Frydnes tha se ishte e rëndësishme të kujtonim botën për dëshmitë e të mbijetuarve të armëve bërthamore.
“Kur shikojmë zhvillimet dhe konfliktet në mbarë botën, e kuptojmë sa thelbësore është të ruajmë një tabu bërthamore - të ruajmë normën - që thotë se armët bërthamore nuk duhet të përdoren kurrë më,” tha ai.
Artikuj të sugjeruar:
