ADHD (çrregullimi i mungesës së vëmendjes dhe hiperaktivitetit) është një nga temat më të diskutuara në TikTok, ku shumë përdorues ndajnë përvojat e tyre me këtë gjendje. Mes lumit të informacionit, është e vështirë të dallosh faktet nga keqinformimi. Prandaj, më poshtë janë disa nga këshillat më të vlefshme që mund të gjeni në TikTok – dhe disa mite që nuk duhen besuar.
Fakt: ADHD nuk është vetëm mungesë përqendrimi
Shumë njerëz e lidhin ADHD-në vetëm me vështirësinë për t’u përqendruar, por realiteti është shumë më kompleks. Pothuajse çdo person me ADHD përballet edhe me vështirësi në rregullimin e emocioneve, çka në raste të caktuara mund të duket si një çrregullim i rëndë i humorit.
Mit: ADHD është një superfuqi
Në TikTok ka nga ata që e përshkruajnë ADHD-në si një dhuratë të fshehtë – një aftësi për të qenë krijues dhe të pandalshëm. E vërteta është se, edhe pse disa njerëz mund ta përdorin hiperpërqendrimin në avantazhin e tyre, ADHD mbetet një gjendje sfiduese dhe lodhëse. Nëse do të kishin mundësinë ta zgjidhnin, shumë njerëz me ADHD do të preferonin të mos e kishin fare.
Fakt: ADHD nuk diagnostikohet vetëm tek fëmijët
Ka një perceptim të gabuar se ADHD është një gjendje që prek vetëm fëmijët dhe që me kalimin e viteve zhduket. Në të vërtetë, simptomat mund të vazhdojnë, të maskohen ose edhe të përkeqësohen me kalimin e kohës. Për më tepër, shumë gra dhe të rritur diagnostikohen vetëm pasi kanë kaluar një pjesë të madhe të jetës duke mos e kuptuar se përse kanë pasur vështirësi të caktuara.
Mit: Ilaçet për ADHD shkaktojnë varësi
Një tjetër keqinformim i përhapur është se medikamentet për ADHD shkaktojnë varësi. Në fakt, studimet tregojnë se personat me ADHD që nuk marrin trajtim janë më të prirur të krijojnë varësi ndaj substancave të ndryshme, pasi përballen me impulsivitetin dhe vendimmarrjen e dobët. Kur përdoren sipas përshkrimit mjekësor, këto ilaçe nuk krijojnë varësi.
Fakt: Simptomat e ADHD-së mund të ndikohen nga hormonet
Shumë gra me ADHD raportojnë përkeqësim të simptomave pas pubertetit, gjatë shtatzënisë ose në menopauzë. Kjo lidhet me nivelin e estrogjenit, i cili ndikon në nivelin e dopaminës - një substancë që truri i personave me ADHD nuk e përpunon siç duhet. Kjo është edhe arsyeja pse efektiviteti i medikamenteve mund të ndryshojë gjatë këtyre fazave hormonale.
Mit: Psikiatrit janë “shitës ilaçesh”
Ekziston një paragjykim i vjetër ndaj psikiatërve, duke i parë ata si njerëz që thjesht japin ilaçe pa marrë parasysh nevojat e pacientit. Në realitet, shumica e psikiatërve synojnë të ndihmojnë pacientët të gjejnë strategjitë më të mira të trajtimit, duke përfshirë si ato pa ilaçe, ashtu edhe medikamentet në rastet e nevojshme.
Në TikTok mund të gjeni shumë këshilla të vlefshme për ADHD, por është e rëndësishme të dini të dalloni faktet nga mitet. Informacioni më i besueshëm vjen nga ekspertët dhe personat me përvojë të vërtetë në këtë fushë, ndaj gjithmonë bëni kujdes se çfarë besoni dhe ndani me të tjerët.
Burime: Cosmopolitan
